കർണാടകയിൽ മുസ്​ലിം സംവരണം എടുത്തുകളഞ്ഞ ബി.ജെ.പി നടപടി; കോടതിയെ സമീപിക്കാനൊരുങ്ങി ജംഇയ്യത്തു ഉലമായെ ഹിന്ദ്​

മുസ്​ലിംകളുടെ നാല് ശതമാനം സംവരണം എടുത്തുകളഞ്ഞ കർണാടക ബി.ജെ.പി സർക്കാറിന്‍റെ നടപടിയെ കോടതിയിൽ ചോദ്യം ചെയ്യുമെന്ന് ജംഇയ്യത്തു ഉലമായെ ഹിന്ദ്​ അറിയിച്ചു. മുസ്‌ലിംകളോട് കാണിക്കുന്ന കടുത്ത അനീതിയാണ് നടപടിയെന്ന് സംഘടന പ്രസിഡന്റ് മൗലാന മഹമൂദ് മദനി പറഞ്ഞു. ദുയൂബന്ദിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. തീരുമാനം പ്രധാനമന്ത്രി മോദിയുടെ പാസ്മന്ദ മുസ്​ലിം ഉന്നമനവുമായി കൈകോർക്കുന്നില്ല.

പ്രധാനമന്ത്രി ഒരു വശത്ത്, പാർശ്വവൽക്കരിക്കപ്പെട്ട മുസ്​ലിംകളുടെ വികസന നയം പ്രോത്സാഹിപ്പിക്കുകയും മറുവശത്ത്, കർണാടകയിലെ അദ്ദേഹത്തിന്റെ പാർട്ടി സർക്കാർ അവരിൽ നിന്ന് സംവരണം തട്ടിയെടുത്ത് മറ്റ് വിഭാഗങ്ങൾക്കിടയിൽ വിതരണം ചെയ്യുകയും ചെയ്യുന്നു. നാല്​ ശതമാനം ഒ.ബി.സി മുസ്ലീം ക്വാട്ട വൊക്കലിഗകൾക്കും ലിംഗായത്തുകൾക്കുമായി വിഭജിച്ചു. ക്വാട്ടക്ക്​ അർഹതയുള്ള മുസ്​ലിംകളെ ഇപ്പോൾ സാമ്പത്തികമായി മുന്നാക്കം നിൽക്കുന്ന വിഭാഗത്തിൽ പെടുത്തിയിട്ടുണ്ട്.

ഇന്ത്യയിലെ മുസ്​ലിംകൾ സാമ്പത്തികമായും വിദ്യാഭ്യാസപരമായും വികസനത്തിന്റെ ഏറ്റവും താഴ്ന്ന നിലയിലാണ് എന്ന വസ്തുതയെ വിവിധ ഔദ്യോഗിക സ്ഥിതിവിവരക്കണക്കുകളും റിപ്പോർട്ടുകളും സ്ഥിരീകരിക്കുന്നതായി അദ്ദേഹം പറഞ്ഞു.