കോൺഗ്രസ്​ എം.എൽ.എയുടെ മകൻ സ്വയം വെടിയുതിർത്ത്​ മരിച്ചു

ഭോപാൽ: മധ്യപ്രദേശിൽ കോൺഗ്രസ്​ എം.എൽ.എയുടെ കൗമാരക്കാരനായ മകൻ സ്വയം വെടിയുതിർത്ത്​ മരിച്ചു. ജബൽപൂരിലെ സ്വന്തംവീട്ടിൽ വ്യാഴാഴ്ച ഉച്ചക്ക്​ ശേഷമാണ്​ സംഭവം. 17കാരനായ വൈഭവ്​ യാദവ്​ പിതാവിന്‍റെ ലൈസൻസുള്ള റിവോൾവർ ഉ​പയോഗിച്ച്​ വെടിവെച്ച്​ ആത്മഹത്യ ചെയ്യുകയായിരുന്നുവെന്ന്​ പൊലീസ്​ പറഞ്ഞു. പിതാവ്​ സഞ്​ജയ്​ യാദവ്​ ബാർഗി മണ്ഡലത്തിൽ നിന്നുള്ള കോൺഗ്രസ്​ എം.എൽ.എയാണ്.

വൈഭവിനെ ആശുപത്രിയിലെത്തിച്ചെങ്കിലും മരിച്ചിരുന്നു. ശുചിമുറിയിൽ വെച്ചാണ്​ കുട്ടി വെടിയുതിർത്തതെന്ന്​ ബന്ധുക്കൾ പറഞ്ഞു. നാലുപേജുള്ള ആത്മഹത്യ കുറിപ്പ്​ കണ്ടെടുത്തു. അച്ചനും അമ്മയും നല്ലവരാണെന്നും തന്‍റെ മരണത്തിൽ മറ്റാരും ഉത്തരവാദികൾ അല്ലെന്നും വൈഭവ്​ ആത്മഹത്യ കുറിപ്പിൽ പറയുന്നു. ആത്മഹത്യക്ക്​ തൊട്ടുമുമ്പ്​ തന്‍റെ കൂടെനിന്നതിന്​ സുഹൃത്തുക്കളെ നന്ദിയറിയിച്ച്​ സന്ദേശവും അയച്ചിരുന്നു.

വൈഭവ്​ വിഷാദത്തിന്​ അടിമയായിരുന്നുവെന്നാണ്​ പൊലീസിന്‍റെ നിഗമനം. അന്വേഷണം ആരംഭിച്ചു. കുട്ടിയുടെ മരണവിവരമറിഞ്ഞ്​ രാഷ്​ട്രീയക്കാരും ജനങ്ങളും എം.എൽ.എയുടെ വീട്ടിലേക്ക്​ ഒഴുകിയെത്തി. ​