പട്ടികജാതിക്കാരി​ പെൺകുട്ടിയെ ബലാത്സംഗം ചെയ്​തശേഷം​ ജീവനോടെ കുഴിച്ചിട്ടു

ബെതുൽ: മധ്യപ്രദേശിലെ ബെതുൽ ജില്ലയിൽ പട്ടികജാതിക്കാരി​ പെൺകുട്ടിയെ ബലാത്സംഗം ചെയ്​തശേഷം​ ജീവനോടെ കുഴിച്ചിട്ടു. 13 കാരിയാണ്​ അതിക്രമത്തിന്​ ഇരയായതെന്ന്​ പോലീസ് പറഞ്ഞു. തിങ്കളാഴ്ച വൈകുന്നേരമാണ് സംഭവം നടന്നത്. 35 കാരനായ പ്രതിയെ അറസ്റ്റുചെയ്തിട്ടുണ്ട്​. ഗുരുതരാവസ്ഥയിലുള്ള പെൺകുട്ടിയെ അയൽ സംസ്​ഥാനമായ മഹാരാഷ്ട്രയിലെ നാഗ്പൂരിലെ ആശുപത്രിയിൽ പ്രവേശിപ്പിച്ചു. ഗോഥഡോംഗ്രി പോലീസ് സ്റ്റേഷൻപരിധിയിലെ ഗ്രാമത്തിലാണ്​ കൊടും ക്രൂരത അരങ്ങേറിയത്​.

ഗ്രാമത്തിലെ ഫാമിൽ മോട്ടോർ സ്വിച്ച് ഓഫ് ചെയ്യാൻ പെൺകുട്ടി ഒറ്റയ്ക്ക് പോയപ്പോഴാണ്​ പ്രതി ബലാത്സംഗത്തിന് ഇരയാക്കിയതെന്ന് ബെതുൽ പോലീസ് സൂപ്രണ്ട് സിമാല പ്രസാദ് പറഞ്ഞു. കുറ്റകൃത്യം മറച്ചുവെക്കാനായി പ്രതി പെൺകുട്ടിയെ അഴുക്കുചാലിലൂടെ വലിച്ചിഴച്ച് സമീപത്തെ കുഴിയിൽ ഇട്ടു. തുടർന്ന്​ കല്ലുകൾ ഉപയോഗിച്ചും മുള്ളുനിറഞ്ഞ കുറ്റിച്ചെടികൾകൊണ്ടും കുഴി മൂടുകയായിരുന്നു. പെൺകുട്ടി വീട്ടിൽ തിരിച്ചെത്താതിരുന്നപ്പോൾ മാതാപിതാക്കളും സഹോദരിയും അവളെ തിരഞ്ഞിറങ്ങി. കുഴിക്ക് സമീപം എത്തിയപ്പോൾ വേദനകൊണ്ട്​ കരയുന്ന പെൺകുട്ടിയുടെ ശബ്​ദം കേൾക്കുകയായിരുന്നെന്ന്​ സഹോദരി പറഞ്ഞു. കുറ്റിക്കാടുകളും കല്ലുകളും നീക്കം ചെയ്താണ്​ കുട്ടിയെ പുറത്തെടുത്തത്​.

ഇരയുടെ കുടുംബം നൽകിയ പരാതിയുടെ അടിസ്ഥാനത്തിൽ ഐപിസി, പട്ടികജാതി, പട്ടികവർഗ (അതിക്രമങ്ങൾ തടയൽ) നിയമം, ലൈംഗിക കുറ്റകൃത്യങ്ങളിൽ നിന്ന് കുട്ടികളെ സംരക്ഷിക്കൽ (പോക്സോ) നിയമത്തിലെ വിവിധ വകുപ്പുകൾ പ്രകാരമാണ്​ പ്രതിയെ അറസ്റ്റ് ചെയ്തത്​.