പടോലെയുടെ രാജിയിൽ മഹാ വികാസ്​ അഗാഡിയിൽ അതൃപ്​തി

മുംബൈ: മഹാരാഷ്​ട്ര നിയമസഭ സ്​പീക്കർ പദവിയിൽ നിന്ന്​ കോൺഗ്രസ്​ നേതാവ്​ നാന പടോലെ രാജിവെച്ചതിൽ സഖ്യകക്ഷികളായ ശിവസേനക്കും എൻ.സി.പിക്കും അതൃപതി. ശിവസേന, എൻ.സി.പി, കോൺഗ്രസ്​ കൂട്ടുകെട്ടിലെ മഹാ വികാസ്​ അഗാഡി സർകാർ നല്ല നിലയിൽ ഭരണം തുടരുന്നതിനിടയിൽ അനാവശ്യ സാഹചര്യങ്ങൾക്ക്​ രാജി വഴിവെച്ചുവെന്ന്​ ശിവസേന നേതാവ്​ സഞ്​ജയ്​ റാവുത്ത്​ ആരോപിച്ചു. പടോലെയുടെ രാജിക്ക്​ മുമ്പ്​ വിഷയം ശിവസേനയും കോൺഗ്രസുമായി ചർച്ച ചെയ്​തിരുന്നില്ല.

പുതിയ സ്​പീകർ തെരഞ്ഞെടുപ്പിന്​ വിലപേശലുകളുണ്ടാകുമെന്നതാണ്​ സഖ്യത്തെ അലട്ടുന്നത്​. കോൺഗ്രസ്​ ക്യാമ്പ് പരോക്ഷമായി ഉപമുഖ്യമന്ത്രി പദം ആവശ്യപ്പെടുന്നുണ്ട്​. എന്നാൽ, സഖ്യം രൂപവത്​കരിച്ചപ്പോൾ കോൺഗ്രസ്​ അധ്യക്ഷ സോണിയ ഗാന്ധി, എൻ.സി.പി അധ്യക്ഷൻ ശരദ്​ പവാർ, ശിവസേന അധ്യക്ഷനും മുഖ്യമന്ത്രിയുമായ ഉദ്ധവ്​ താക്കറെ എന്നിവർ അന്തിമമായി അംഗീകരിച്ച സൂത്ര വാക്യത്തിൽ മാറ്റമുണ്ടാകില്ലെന്ന് എൻ.സി.പിയും ശിവസേനയും വ്യക്​തമാക്കി. മുഖ്യമന്ത്രി പദമുൾപടെ 16 വകുപ്പുകൾ ശിവസേനക്ക്​, ഉപമുഖ്യമന്ത്രിയടക്കം 15 വകുപ്പുകളും നിയമസഭ ഉപാധ്യക്ഷ പദവിയും എൻ.സി.പിക്ക്​, 12 വകുപ്പുകളും സ്​പീക്കർ പദവിയും കോൺഗ്രസിന്​ എന്നതാണ്​ ധാരണ.

മഹാരാഷ്​ട്ര കോൺഗ്രസ്​ അധ്യക്ഷ പദവി ഏറ്റെടുക്കുന്നതിന്‍റെ മുന്നോടിയായാണ്​ നാന പടോലെ സ്​പീക്കർ പദവി രാജിവെച്ചത്​. നിലവിൽ റവന്യൂമന്ത്രിയായ ബാലാസാഹെബ്​ തോറാട്ടാണ്​ പാർട്ടി മഹാരാഷ്​ട്ര അധ്യക്ഷൻ. കോൺഗ്രസ്​ നിയമസഭ കക്ഷി നേതാവും അദ്ദേഹമാണ്​.

കർഷക പ്രക്ഷോഭം നടക്കുന്നതിനിടെ കർഷക നേതാവായ നാനാ പടോലെയെ പാർട്ടി അമരത്ത്​ കൊണ്ടുവരുന്നത്​ ഗുണം ചെയ്യുമെന്നാണ്​ നിരീക്ഷണം. കോൺഗ്രസിന്‍റെ പരമ്പരാഗത വോട്ട്​ ബാങ്കായ ഒ.ബി.സി വിഭാഗത്തിലെ കുൻബി സമൂദായക്കാരനുമാണ്​ പടോലെ. അധ്യക്ഷ പദവിക്കൊപ്പം പടോലെയെ മന്ത്രിയുമാക്കണമെന്ന​ അദ്ദേഹത്തിന്‍റെ അനുയായികളുടെ ആവശ്യം ഹൈക്കമാൻഡ്​ അംഗീകരിച്ചിട്ടില്ല.

പടോലെക്ക്​ പകരം സ്​പീകറാകാൻ കോൺഗ്രസിൽ നിരവധി നേതാക്കൾ ശ്രമം നടത്തുന്നുണ്ട്​. മുൻ മുഖ്യമന്ത്രി പൃഥ്വിരാജ്​ ചവാന്‍റെ പേര്​ നേരത്തെ ഉയർന്നിരുന്നു. എന്നാൽ, ഹൈക്കമാൻഡിനെതിരെ നിലപാടെടുത്ത നേതാക്കളിൽ ചവാനുമുണ്ട്​. അതിനാൽ, ചവാനെ സ്​പീക്കറാക്കുമെന്ന്​ നേതാക്കൾ കരുതുന്നില്ല. പുണെ, ഭോർ മണ്ഡലത്തിൽ നിന്നുളള എം.എൽ.എ സൻഗ്രാം തോപ്​തെ, മുംബൈയിലെ മുമ്പാദേവി മണ്ഡലത്തിൽ നിന്നുള്ള എം.എൽ.എ അമിൻ പട്ടേൽ എന്നിവരുടെ പേരുകളും ഉയർന്നുവരുന്നു.