മഹാരാഷ്​ട്ര വീണ്ടും സമ്പൂർണ ലോക്​ഡൗണിലേക്കോ? നാളെ നിർണായക യോഗം

മുംബൈ: കോവിഡ് കേസുകൾ അനിയന്ത്രിതമായി വർധിക്കുന്നതിനാലും വരാനിരിക്കുന്ന ഉത്സവങ്ങളും കണക്കിലെടുത്ത് സംസ്ഥാനത്ത് സമ്പൂർണ ലോക്​ഡൗണിന്​ നിർദേശിച്ചിട്ടുണ്ടെന്ന് മഹാരാഷ്ട്ര ദുരന്തനിവാരണ മന്ത്രി വിജയ് വാഡെറ്റിവാർ പറഞ്ഞു. വൈറസിന്‍റെ ശൃംഖല തകർക്കുന്നതിൽ ലോക്​ഡൗൺ നിർണായകമാണ്​.

കഴിഞ്ഞദിവസം ഓൺലൈനിൽ ചേർന്ന യോഗത്തിൽ സംസ്ഥാനത്ത് സമ്പൂർണ ലോക്​ഡൗൺ നിർദേശിച്ചതായി വിജയ് വഡെറ്റിവാർ പറഞ്ഞു. ശനിയാഴ്ച നടക്കുന്ന സർവകക്ഷി യോഗത്തിൽ ലോക്​ഡൗൺ സംബന്ധിച്ച്​ അന്തിമ തീരുമാനം മുഖ്യമന്ത്രി ഉദ്ദവ് താക്കറെയാണ്​ എടുക്കേണ്ടത്​.

എല്ലാ ദിവസവും 50,000 മുതൽ 60,000 കേസുകളാണ്​ മഹാരാഷ്​ട്രയിൽ റിപ്പോർട്ട്​ ചെയ്യുന്നത്​. നിലവിൽ 5.31 ലക്ഷം സജീവ കേസുകളുണ്ട്. വ്യാപനം ഇതുപോലെ തുടരുകയാണെങ്കിൽ ഉടൻ തന്നെ 10 ലക്ഷത്തിലധികം സജീവ കേസുകൾ ഉണ്ടാകും. അതിനാലാണ്​ മൂന്നാഴ്ചയെങ്കിലും കർശനമായി അടച്ചിടാൻ നിർദേശിക്കുന്നത്​ - മന്ത്രി പറഞ്ഞു.

നിലവിൽ വാരാന്ത്യങ്ങളിൽ ലോക്​ഡൗൺ ഉ​ണ്ടെങ്കിലും പച്ചക്കറി മാർക്കറ്റുകളിലടക്കം നിരവധി പേരാണ്​ എത്തുന്നത്​. വീടുകളിൽ പച്ചക്കറികളും പലചരക്ക് സാധനങ്ങളും വിതരണം ചെയ്യാനുള്ള സൗകര്യം ഒരുക്കണം. നാളത്തെ യോഗത്തിൽ മുഖ്യമന്ത്രി തന്‍റെ അഭിപ്രായത്തോട് യോജിക്കുമെന്നാണ്​ പ്രതീക്ഷ -വിജയ് വാഡെറ്റിവാർ കൂട്ടിച്ചേർത്തു.

കോവിഡ് മഹാമാരി ഇന്ത്യയിൽ ഏറ്റവും കൂടുതൽ ബാധിച്ച സംസ്ഥാനമാണ് മഹാരാഷ്ട്ര. വ്യാഴാഴ്ച സംസ്ഥാനത്ത് 56,286 പുതിയ കേസുകളാണ്​ റിപ്പോർട്ട് ചെയ്​തത്​. 376 പേർ മരിച്ചു. ഇതോടെ ആകെ മരണം 57,028 ആയി.