മദ്യ വിൽപന പുനരാരംഭിച്ച ആദ്യ ദിനം മഹാരാഷ്​ട്രയിൽ വിറ്റത്​ നാലു ലക്ഷം ലിറ്റർ

മുംബൈ: ലോക്​ഡൗണിൽ നിലച്ച്​ പോയ മദ്യ വിൽപന പുനരാരംഭിച്ചപ്പോൾ മഹാരാഷ്​ട്ര സർക്കാറിന്​ ആദ്യ ദിനത്തെ വരുമാനം 11 കോടി. മദ്യ വിൽപന പുനരാരംഭിച്ച തിങ്കളാഴ്​ചത്തെ കണക്കാണിത്​. 

നാല്​ ലക്ഷത്തോളം ലിറ്റർ ഇന്ത്യൻ നിർമിത വിദേശ മദ്യമാണ്​ തിങ്കളാഴ്​ച മാത്രം വിറ്റത്​. ബാറുകൾ പ്രവർത്തിക്കാൻ അനുമതി നൽകിയിട്ടില്ല. മദ്യ വിൽപന കടകളി​ൽ മാത്രം നടന്ന ഇടപാടാണിത്​. 

മദ്യകടകൾക്ക്​ മുമ്പിൽ വലിയ നിരയായിരുന്നു എല്ലായിടത്തും. കോൽഹാപൂർ, പൂനെ തുടങ്ങിയിടങ്ങളിൽ തിരക്ക്​ മൂലം പൊലീസിന്​ ലാത്തിചാർജ്​ ചെയ്യേണ്ടി വന്നു. ചില ജില്ലകളിൽ മദ്യ വിൽപനക്ക് കലക്​ടർമാർ അനുമതി നൽകിയിട്ടില്ല. 

മാർച്ച്​ 25 ന്​ തുടങ്ങിയ ലോക്​ഡൗണിൽ ​പ്രവർത്തനം നിർത്തിയ മദ്യ വിൽപന കടകൾ തിങ്കളാഴ്​ച മുതൽ തുറക്കാൻ സംസ്​ഥാന സർക്കാറാണ്​ തീരുമാനിച്ചത്​. എന്നാൽ, എല്ലാ കടകൾക്കു മുമ്പിലും വലിയ നിര തന്നെ രൂപപ്പെട്ടതോടെ രോഗവ്യാപന ഭീതിയും ശക്​തമായിട്ടുണ്ട്​. നിലവിൽ കോവിഡ്​ കൂടുതൽ ബാധിച്ച ഇന്ത്യൻ സംസ്​ഥാനമാണ്​ മഹാരാഷ്​ട്ര. 

25,500 കോടി രുപയാണ്​ മഹാരാഷ്​ട്ര സർക്കാറിന്​ മദ്യത്തിൽ നിന്നുള്ള വാർഷിക വരുമാനം. ശരാശരി ദിവസ വരുമാനം 78 കോടി. ബാറുകളിൽ നിന്നടക്കമുള്ള വരുമാനം ഇതിലുൾപ്പെടും. നിലവിൽ ബാറുകൾ പ്രവർത്തിക്കുന്നില്ല. മാത്രമല്ല, പല ജില്ലകളിലും മദ്യ വിൽപനക്ക്​ അനുമതി നൽകിയിട്ടുമില്ല.