സ്വകാര്യ ആശുപത്രികളിലെ 80 ശതമാനം കിടക്കകൾ ഏറ്റെടുത്ത്​ മഹാരാഷ്​ട്ര സർക്കാർ 

മുംബൈ: കോവിഡ്​ ബാധിതരുടെ എണ്ണം 40,000 കടന്ന്​ കുതിക്കുന്ന സാഹചര്യത്തിൽ സംസ്​ഥാനത്തെ സ്വകാര്യ ആശുപത്രികളിലെ 80 ശതമാനം കിടക്കകളുടെ നിയന്ത്രണം മഹാരാഷ്​ട്ര സർക്കാർ ഏറ്റെടുത്തു.  സ്വകാര്യ ആശുപത്രികൾ ചികിത്സക്കായി രോഗികളിൽ നിന്നും ഭീമമായ തുക വാങ്ങുന്നതായി പരാതി ഉയർന്നതിനെത്തുടർന്ന്​ ചികിത്സ നിരക്കുകൾ ഉദ്ധവ്​ താക്കറെ സർക്കാർ ഏകീകരിച്ചിട്ടുണ്ട്​.​ ഏറ്റെടുത്ത ബെഡിലെ രോഗികളിൽ നിന്നും വാങ്ങാവുന്ന ബിൽ തുകയെക്കുറിച്ചും വ്യാഴാഴ്​ച രാത്രി പുറത്തിറക്കിയ ഉത്തരവിൽ പറയുന്നു​. ശേഷിക്കുന്ന 20 ശതമാനം ബെഡുകളിൽ ആശുപത്രിക്കാർക്ക്​ അവരുടെ ചാർജുകൾ ഈടാക്കാം. 

ഐസൊലേഷൻ ബെഡുകൾക്ക്​ 4000, ഐ.സി.യു ബെഡുകൾക്ക്​ 7500, വ​െൻറിലേറ്റർ സൗകര്യമുള്ള ഐ.സി.യു ബെഡുകൾക്ക്​ 9000 രൂപ വീതം മാത്രമാണ്​ ഈടാക്കാനാകുക. ഇരുവിഭാഗം ബെഡുകളിലുമായി നൽകുന്ന ചികിത്സയുടെ ഗുണനിലവാരത്തിൽ മാറ്റങ്ങളുണ്ടാകരുതെന്ന്​ നിർദേശമുണ്ട്​. 

ശസ്​ത്രക്രിയക്കും കാൻസർ ചികിത്സയടക്കമുള്ളവയടക്കമുള്ള 270 സൗകര്യങ്ങൾക്കുള്ള നിരക്കിൽ​ സർക്കാർ തുക നിശ്ചയിച്ചു. ഡോക്​ടർമാരുടെ ഫീസടക്കമാണ്​ പാക്കേജ്​. ചാരിറ്റബ്​ൾ ട്രസ്​റ്റുകൾ നടത്തുന്ന ആശുപത്രികൾളും നഴ്​സിങ്​ ഹോമുകളുമടക്കം ഉത്തരവിൻെറ പരിധിയിൽ പെടുന്നതാണ്​. 

സാധാരണ പ്രസവത്തിന്​ 75,000 രൂപയിലും, സിസേറിയൻ പ്രസവങ്ങൾക്ക്​ 86,250 രൂപയിലും കൂടുതൽ ഈടാക്കാൻ പാടില്ല. കാൽമുട്ട്​ മാറ്റിവെക്കൽ ശസ്​ത്രക്രിയക്ക്​ 1,60,000 രൂപയും ആൻജിയോഗ്രാഫിക്ക്​ 12,000 രൂപയിൽ കൂടുതലും ബിൽ നൽകാൻ പാടില്ല. ആൻജിയോപ്ലസ്​റ്റി ശസ്​ത്രക്രിയക്ക്​ 1.2 ലക്ഷം രൂപ മാത്രമേ ഈടാക്കാൻ പാടുള്ളൂ.