മഹാരാഷ്​ട്രയിൽ കോവിഡ്​ വാക്​സിൻ സൗജന്യം

മുംബൈ: മഹാരാഷ്​ട്രയിൽ എല്ലാവർക്കും കോവിഡ്​ വാക്​സിനേഷൻ സൗജന്യമായിരിക്കുമെന്ന്​ മന്ത്രി നവാബ്​ മാലിക്​. രാജ്യത്ത്​ കോവിഡ്​ ഏറ്റവും രൂക്ഷമായി ബാധിച്ച സംസ്​ഥാനങ്ങളിൽ ഒന്നായ മഹാരാഷ്​ട്രയിൽ പ്രതിദിനം 60000ത്തിൽ കൂടുതൽ പേർക്കാണ്​ രോഗബാധ സ്​ഥിരീകരിക്കുന്നത്​.

തീരുമാനം കാബിനറ്റിൽ ചർച്ച ചെയ്​തതാണെന്നും വാക്​സിനേഷനായുള്ള ആഗോള ടെൻഡർ വിളിക്കുമെന്നും നവാബ്​ മാലിക്​ പറഞ്ഞു. മഹരാഷ്​ട്രക്ക്​ പുറമേ മധ്യപ്രദേശ്​, ജമ്മു കശ്​മീർ, ഗോവ, കേരളം, ഛത്തിസ്ഗഢ്​, ബീഹാർ, ഝാർഖണ്ഡ്​, അസം, സിക്കിം, പശ്ചിമ ബംഗാൾ, തമിഴ്​ നാട്​, ആന്ധ്രപ്രദേശ്​, തെലങ്കാന, ഹരിയാന എന്നീ സംസ്​ഥാനങ്ങളും പ്രായപൂർത്തിയായവർക്ക്​ വാക്​സിനേഷൻ സൗജന്യമായിരിക്കു​െമന്ന്​ പ്രഖ്യാപിച്ചിരുന്നു.

കോവിഡിന്‍റെ മൂന്നാമത്തെ തരംഗം ഉടൻ ഉണ്ടാകുമെന്നും അത്​ രണ്ടാം തരംഗത്തേക്കാൾ ശക്തമോ ദുർബലമോ ആണോ എന്ന് ഇപ്പോൾ നിർണയിക്കാനാവില്ലെന്നും മന്ത്രി ആദിത്യ താക്കറെ നേരത്തെ അഭിപ്രായ​െപ്പട്ടിരുന്നു. പ്രതിരോധ കുത്തിവെപ്പ്​ ​​സഹായിക്കുന്നില്ലെങ്കിലും ഭാവിയിലേക്കുള്ള തയാറെടുപ്പിന്​ ഇത്​ ഗുണകരമാകുമെന്ന്​ അദ്ദേഹം പറഞ്ഞു.

കോവിഡിനെതിരായ ഏറ്റവും വലിയ ആയുധം വാക്​സിനേഷൻ ആണെന്നായിരുന്നു കോവിഡ്​ സാഹചര്യം വിലയിരുത്തുന്നതിനുള്ള ഉന്നതതല യോഗത്തിൽ​ പ്രധാനമന്ത്രി നരേന്ദ്ര മോദിയും അഭിപ്രായപ്പെട്ടത്​. രാജ്യത്ത്​ 18 വയസിന്​ മുകളിലുള്ളവർക്കുള്ള വാക്​സിനേഷൻ യജ്ഞം മേയ്​ ഒന്നിന്​ ആരംഭിക്കാനിരിക്കുകയാണ്​.

വാക്​സിൻ നിർമാതാക്കളിൽ നിന്നും വാക്​സിൻ വാങ്ങി സംസ്​ഥാനങ്ങൾക്ക്​ നൽകിയിരുന്ന കേ​ന്ദ്ര സർക്കാർ ഇപ്പോൾ നയം മാറ്റിയിരിക്കുകയാണ്​. ഇനി മുതൽ സംസ്​ഥാനങ്ങൾക്ക്​ കമ്പനികളിൽ നിന്ന്​ നേരിട്ട്​ വാക്​സിൻ വാങ്ങാമെന്നാണ്​ കേന്ദ്രം പറയുന്നത്​.