അതിവേഗത്തിലെത്തിയ ട്രക്ക്​ നിർത്തിയിട്ട ബസ്​ ഇടിച്ചുതെറിപ്പിച്ചു; റോഡിൽ ഉറങ്ങിയ 18 പേർക്ക്​ ദാരുണാന്ത്യം

ലഖ്​നോ: രാത്രി നിർത്തിയിട്ട ഇരുനില ബസിനു മുന്നിൽ ഉറങ്ങിയ 18 തൊഴിലാളികൾക്കു മേൽ ചക്രങ്ങൾ കയറിയിറങ്ങി ദാരുണാന്ത്യം. അമിത വേഗത്തെ തുടർന്ന്​ നിയന്ത്രണം വിട്ട ട്രക്ക്,​ ബസ്​ ഇടിച്ചുതെറിപ്പിച്ചതിനെ തുടർന്നാണ്​ അടിയിൽപെട്ട്​ കൂട്ട മരണം സംഭവിച്ചത്​. ഉത്തർപ്രദേശ്​ തലസ്​ഥാനമായ ലഖ്​നോയിൽനിന്ന്​ 28 കിലോമീറ്റർ അകലെ ബാരബങ്കിയിലാണ്​ സംഭവം. 19 തൊഴിലാളികൾക്ക്​ പരിക്കേറ്റു.

ഹരിയാനയിൽനിന്ന്​ മടങ്ങുകയായിരുന്ന ബിഹാർ സ്വദേശികളായ തൊഴിലാളികൾ സഞ്ചരിച്ച ബസ്​ രാത്രിയിൽ വഴിയിൽ നിന്നുപോകുകയായിരുന്നു. ഇതേ തുടർന്ന്​ നിർത്തിയിട്ട ബസിനുമുന്നിലായി റോഡരികിൽ ഇവർ കിടന്നുറങ്ങി. പുലർച്ചെ 1.30ഓടെ അമിതവേഗത്തിലെത്തിയ ട്രക്ക്​ പിന്നിൽനിന്ന്​ ഇടിച്ചുകയറി മു​ന്നോട്ടുനീങ്ങിയ ബസിനടിയിൽപെട്ടായിരുന്നു തൊഴിലാളികളുടെ മരണം. പരിക്കേറ്റവരെ ആശുപത്രിയിലേക്ക്​ മാറ്റി. ഇവരുടെ പരിക്ക്​ അതിഗുരുതരമാണെന്ന്​ ആശുപത്രി വൃത്തങ്ങൾ അറിയിച്ചു. ബസിനടിയിൽകുടുങ്ങിയവരെ ഏറെ വൈകിയാണ്​ പുറത്തെടുത്തത്​.

ബിഹാറിലെ സീതാമഢി, സഹർസ മേഖലകളിൽനിന്നുള്ളവരായിരുന്നു തൊഴിലാളികൾ. ബസിന്‍റെ ആക്​സിൽ ഷാഫ്​റ്റ്​ പൊട്ടിയതിനെ തുടർന്നാണ്​ രാത്രി നിന്നുപോയത്​. യാത്രക്കാർ ഇറങ്ങി ബസിനു മുന്നിലായി ഉറങ്ങാൻ കിടക്കുകയായിരുന്നു.