പശ്ചിമ ബംഗാളിൽ ബുധനാഴ്ച മന്ത്രിസഭ പുനഃസംഘടിപ്പിക്കുമെന്ന് മമത ബാനർജി

ന്യൂഡൽഹി: അധ്യാപന കുംഭകോണത്തിൽ പെട്ട് പാർഥ ചാറ്റർജിയെ പുറത്താക്കിയതിനു പിന്നാലെ പശ്ചിമ ബംഗാളിൽ ബുധനാഴ്ച മന്ത്രിസഭ പുനഃസംഘടിപ്പിക്കുമെന്ന് മുഖ്യമന്ത്രി മമത ബാനർജി അറിയിച്ചു. അഞ്ചു പുതുമുഖങ്ങളെ മന്ത്രിസഭയിൽ ഉൾപ്പെടുത്തുമെന്നും മമത സൂചിപ്പിച്ചു. '

'സുബ്രത മുഖർജി, സാധൻ പാണ്ഡെ എന്നിവരെ പശ്ചിമ ബംഗാളിനു നഷ്ടമായി. പാർഥ ജയിലിലുമായി. അവരുടെയെല്ലാം ജോലി എനിക്ക് ഒറ്റയ്ക്കു നിർവഹിക്കാൻ സാധ്യമല്ല''- മമത പറഞ്ഞു. നിലവിലെ മന്ത്രിസഭ പിരിച്ചുവിട്ട് പുതിയത് രൂപീകരിക്കാൻ പദ്ധതിയില്ലെന്നും മമത വ്യക്തമാക്കി. സംസ്ഥാനത്തെ ജില്ലകളുടെ എണ്ണം 23ൽ നിന്ന് 30ആയി വർധിച്ചു. സുന്ദർബൻ, ഇച്ഹെമാടി, റാണാഘട്ട്, ബിഷ്ണുപുർ,ജാൻഗിപുർ,ബെഹ്റാംപുർ,ബസിർഹത് എന്നിവയാണ് പുതിയ ജില്ലകൾ-മമത പറഞ്ഞു.

അധ്യാപന കുംഭകോണക്കേസിൽ എൻഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തതോടെ ജൂലൈ 28നാണ് പാർഥ ചാറ്റർജിയെ മന്ത്രിസ്ഥാനത്തു നിന്ന് പുറത്താക്കിയത്.

പാർഥയുടെ സഹായിയായ നടിയും മോഡലുമായ അർപിത ചാറ്റർജിയുടെ കൊൽക്കത്തയിലെ ഫ്ലാറ്റുകളിൽ നിന്ന് 50 കോടി രൂപ ഇ.ഡി പിടികൂടിയിരുന്നു. ഈ പണം മുഴുവൻ പാർഥയുടെതാണെന്നാണ് അർപിത ഇ.ഡിക്കു മൊഴി നൽകിയത്. എന്നാൽ പണം ത​ന്റേതല്ലെന്നും സത്യം വൈകാതെ പുറത്തുവരുമെന്നുമാണ് പാർഥ മാധ്യമങ്ങളോട് പറഞ്ഞത്. പാർഥ അഴിമതിക്കേസിൽ അറസ്റ്റിലായതോടെ മമത സർക്കാരിനെതിരെ വ്യാപക വിമർശനമുയർന്നിരുന്നു.