കശ്​മീരിൽ പെരുന്നാൾ പ്രഭാഷണത്തിനിടെ ഫലസ്​തീന്​ വേണ്ടി പ്രാർഥിച്ചയാൾ അറസ്​റ്റിൽ

ശ്രീനഗർ: ജമ്മു കശ്​മീരിൽ പെരുന്നാൾ പ്രഭാഷണത്തിനിടെ ഫലസ്​തീൻ ജനതക്കുവേണ്ടി പ്രാർഥിക്കുകയും അവരുടെ പോരാട്ടത്തിന്​​ ​െഎക്യപ്പെടുകയും ചെയ്​ത മതപ്രബോധകനെ പൊലീസ്​ അറസ്​റ്റ്​ ചെയ്​തു. റെബാൻ സ്വദേശിയായ സർജൻ ബർകതിയെയാണ് രണ്ട്​ ദിവസത്തിനുശേഷം​ പൊലീസ്​ അറസ്​റ്റ്​ ചെയ്​തതെന്ന്​ കുടുംബാംഗങ്ങളെ ഉദ്ധരിച്ച്​ 'ഒൗട്ട്​ലുക്ക് ഇന്ത്യ'​ റിപ്പോർട്ട്​ ചെയ്​തു. ആറ് മിനിറ്റ്​ നീണ്ട ​പ്രസംഗത്തിൽ ഫലസ്തീനിലെ സ്​ഥിതിഗതികളെ കുറിച്ച്​ സംസാരിച്ച ബർകതി അവരുടെ ധൈര്യത്തെ ​പ്രശംസിക്കുകയും വിജയത്തിനായി പ്രാർഥിക്കുകയും ചെയ്​തിരുന്നു.

അതേസമയം, ഫലസ്​തീന്​ വേണ്ടി സംസാരിച്ചതിന്​ ബർകതിയെ അറസ്​റ്റ്​ ചെയ്തിട്ടുണ്ടോ എന്ന്​ പൊലീസിലെ മുതിർന്ന ഉദ്യോഗസ്​ഥനോട്​ അന്വേഷിച്ച മാധ്യമപ്രവർത്തകന്,​ 'ഇതെല്ലാം അറിയുന്ന നിങ്ങൾ പിന്നെയും ഞങ്ങളോട്​ എന്തിനാണ്​ ചോദിക്കുന്നത്​' എന്ന മറുപടിയാണ്​ ലഭിച്ചത്​. ഫലസ്തീനിനെ അനുകൂലിച്ച് ധാരാളം ആളുകൾ സംസാരിക്കുന്നുണ്ടെന്നും അവരിൽ ആരെയും അറസ്റ്റ് ചെയ്തിട്ടില്ലെന്നും മറ്റൊരു ഉദ്യോഗസ്ഥൻ ഒൗട്ട്‌ലുക്കിനോട് പറഞ്ഞു. എന്തുകൊണ്ടാണ് ബർകതിയെ മാത്രം അറസ്റ്റ് ചെയ്തതെന്ന് വീണ്ടും ചോദിച്ചപ്പോൾ അദ്ദേഹം പ്രതികരിക്കാൻ വിസമ്മതിക്കുകയും ചെയ്​തു.

നാല്​ വർഷത്തോളം പൊലീസ്​ കസ്​റ്റഡിയിലായിരുന്ന ബർകതി കഴിഞ്ഞ ഒക്ടോബറിലാണ്​ ജയിൽ മോചിതനായത്​. സർക്കാർ വിരുദ്ധ റാലികൾ സംഘടിപ്പിച്ചെന്ന്​ ആരോപിച്ച്​ 2016ൽ ഇയാളെ പൊതുസുരക്ഷാ നിയമപ്രകാരം കേസെടുത്ത്​ അറസ്​റ്റ്​ ചെയ്യുകയായിരുന്നു.

ഏതാനും ദിവസങ്ങളായി ഫലസ്തീന് അനുകൂലമായ ധാരാളം പോസ്​റ്റുകൾ കശ്മീരിലെ ജനങ്ങൾ സമൂഹ മാധ്യമങ്ങളിൽ പങ്കുവെക്കുന്നുണ്ട്​. ഇതിനെതിരെയും പൊലീസ്​ രംഗത്തു വന്നിട്ടുണ്ട്​. ഫലസ്​തീനിലെ പോരാട്ടം ചൂണ്ടിക്കാട്ടി കശ്​മീരിലെ സമാധാനം തകർക്കാൻ പലരും ശ്രമിക്കുന്നുണ്ടെന്നും അവർക്കെതിരെ കടുത്ത ശിക്ഷയു​ണ്ടാകുമെന്നും കശ്​മീർ സോൺ പൊലീസ്​ ട്വീറ്ററിൽ വ്യക്​തമാക്കി.

'ഫലസ്​തീനിലെ സാഹചര്യം ഉപയോഗിച്ച്​ കശ്മീർ താഴ്‌വരയിലെ ക്രമസമാധാനം തകർക്കാൻ ശ്രമിക്കുന്ന ഘടകങ്ങളെക്കുറിച്ച് ജമ്മു കശ്മീർ പൊലീസ് സൂക്ഷ്മമായി നിരീക്ഷിക്കുന്നുണ്ട്. ക്രമസമാധാനം ഉറപ്പുവരുത്താൻ പൊലീസിന് നിയമപരമായ ഉത്തരവാദിത്തമുണ്ട്. കശ്മീർ തെരുവുകളിൽ അക്രമവും അധാർമികയും സൃഷ്​ടിക്കാൻ ആയെും അനുവദിക്കില്ല. ഇവിടെ അഭിപ്രായ സ്വാതന്ത്ര്യമുണ്ട്​. പക്ഷെ, അത്​ അക്രമത്തിനായി ഉപയോഗിക്കരുത്​. അക്രമത്തിനും നിയമലംഘനത്തിനും കാരണമാകുന്ന സമൂഹ മാധ്യമങ്ങളിലെ പോസ്​റ്റുകൾക്കെതിരെ നിയമ നടപടി സ്വീകരിക്കും' -പൊലീസ്​ വ്യക്​തമാക്കി.