നരഭോജി കടുവയെ മൈസൂർ വന്യജീവി സംരക്ഷണ കേന്ദ്രത്തിലേക്ക്​ മാറ്റും

ചെന്നൈ: മൂന്നാഴ്​ചക്കാലത്തെ തെരച്ചിലിനൊടുവിൽ പിടിയിലായ T 23 എന്ന പേരിലറിയപ്പെടുന്ന നരഭോജി കടുവയെ മൈസൂർ വന്യജീവി സംരക്ഷണ കേന്ദ്രത്തിലേക്ക്​ കൊണ്ടുപോകാൻ തീരുമാനം. തമിഴ്​നാട്​ വനം മന്ത്രി രാമചന്ദ്രൻ വാർത്താസമ്മേളനത്തിൽ അറിയിച്ചതാണ്​ ഇക്കാര്യം.

മൈസൂരിലെ വന്യജീവി സംരക്ഷണ കേന്ദ്രത്തിലെ റെസ്​ക്യൂ സെൻററിൽ മതിയായ ചികിൽസ ലഭ്യമാക്കുമെന്ന്​ മന്ത്രി പറഞ്ഞു. നേരത്തെ ചെന്നൈ വണ്ടലൂർ മൃഗശാലയിലേക്ക്​ കൊണ്ടുപോകാനാണ്​ വനം അധികൃതർ പദ്ധതിയിട്ടിരുന്നത്​.

വെള്ളിയാഴ്​ച ഉച്ചക്ക്​ രണ്ടരയോടെ മസിനഗുഡി വനത്തിൽ രണ്ടാമത്തെ മയക്കുവെടിയേറ്റാണ്​ കടുവ കീഴടങ്ങിയത്​. ഒരു വർഷത്തിനിടെ ഗൂഡല്ലൂരിലും പരിസര പ്രദേശങ്ങളിലും നാലുപേരെയാണ്​ ഇൗ കടുവ കൊന്നത്​. ഇതിന്​ പുറമെ മുപ്പതിലധികം കന്നുകാലികളെയും കൊന്നുതിന്നു. കടുവയെ പിടികൂടുന്നതിന്​ 150ഒാളം കേരള- തമിഴ്​നാട്​ വനം ജീവനക്കാർ രണ്ട്​ കുങ്കിയാനകളുടെയും പ്രത്യേക പരിശീലനം നേടിയ നായ്​ക്കളുടെയും സേവനം ഉപയോഗപ്പെടുത്തിയിരുന്നു.