മർദനമേറ്റ മുസ്​ലിം കച്ചവടക്കാരന് വേണ്ടി പ്രതിഷേധിച്ചവർക്ക്​​​ പാക്​ ബന്ധം - മധ്യ​പ്രദേശ്​ മന്ത്രി

ഭോപ്പാൽ: ഹിന്ദു ഭൂരിപക്ഷ പ്രദേശത്ത്​ കച്ചവടം നടത്തിയെന്നാരോപിച്ച്​ മുസ്​ലിം യുവാവിന്​ ക്രൂര മർദനം നേരിട്ട സംഭവത്തിൽ പുതിയ വാദമുഖവുമായി ബി.ജെ.പി മന്ത്രി. സംഭവത്തിൽ പ്രതിഷേധിച്ചവർക്ക്​​ പാക്​ ബന്ധമുണ്ടെന്ന്​ മധ്യപ്രദേശ്​ ആഭ്യന്തര മന്ത്രിയും ബി.ജെ.പി നേതാവുമായ നരോട്ടം മിശ്ര ആരോപിച്ചു.

''വിഷയത്തിൽ പ്രതിഷേധിച്ച അൽതമാസ്​ ഖാൻ എന്നയാൾക്ക്​ ഉവൈസിയുടെ എ.ഐ.എം.ഐ.എമ്മുമായി ബന്ധമുണ്ട്​. വളക്കച്ചവടക്കാരനെതിരായ മർദനത്തിൽ പൊലീസ്​ സ്​റ്റേഷന്​ മുന്നിൽ പ്രതിഷേധിച്ച ഇയാളടക്കമുള്ള നാലുപേർ ഫേസ്​ബുക്കിലൂടെയും വാട്​സ്​ആപ്പിലൂടെയും പാകിസ്​താനുമായി ബന്ധമുള്ളവരാണ്. മധ്യപ്രദേശിലെ സമാധാനം തകർക്കലാണ്​ ഇവരുടെ ലക്ഷ്യം​'' -നരോട്ടം മിശ്ര പ്രതികരിച്ചു.

മധ്യപ്രദേശിലെ ഇൻഡോറിനടുത്തുള്ള ഗോവിന്ദ്​ നഗറിൽ വളക്കച്ചവടം നടത്തിയ 25കാരൻ തസ്​ലീമിനുനേരെയാണ്​ ആഗസ്​റ്റ്​ 22ന്​ ആക്രമണമുണ്ടായത്​. ഹിന്ദു ഏരിയയിൽ ഇനി മേലിൽ വരരുതെന്നും ഞങ്ങളുടെ പെങ്ങൻമാരും പെൺമക്കളും വരുന്നയിടത്ത്​ വള വിൽക്കുകയാണോ എന്നും ചോദിച്ചായിരുന്നു മർദനം. ക്രൂരമായി മർദിച്ച ശേഷം യുവാവിന്‍റെ കച്ചവട സാധനങ്ങളും നശിപ്പിച്ചു. സംഭവത്തിന്‍റെ വിഡിയോ ദൃശ്യങ്ങൾ വ്യാപകമായി പ്രചരിച്ചതോടെ സംഭവം രാഷ്​ട്രീയ വിവാദമായിരുന്നു​. സംഭവത്തിൽ പ്രതിഷേധവുമായി കോൺഗ്രസ്​ നേതാവ്​ ഇമ്രാൻ പ്രതാപ്​ഗഢി രംഗത്തെത്തി.

എന്നാൽ സംഭവം വർഗീയ ആക്രമണമല്ലെന്ന വിശദീകരണവുമായി നരോട്ടം മിശ്ര നേ​രത്തെതയും രം​ഗത്തെത്തിയിരുന്നു. മുസ്​ലിം കച്ചവടക്കാരൻ പേര്​ മറച്ചുവെച്ച്​ ഹിന്ദുപേരിൽ കച്ചവടം നടത്തുകയായിരുന്നെന്നും സാവൻ ഉത്സവത്തിന്​ ഞങ്ങളുടെ പെൺമക്കൾ ധരിക്കുന്ന വളകളും ​മെഹന്തിയും വിൽക്കുകയായിരുന്നെന്നും നരോട്ടം മിശ്ര പറഞ്ഞു. അതുകൊണ്ടാണ്​ അക്രമണം ഉണ്ടായതെന്നും വർഗീയ നിറം നൽകരുതെന്നും മിശ്ര കൂട്ടിച്ചേർത്തു. സംഭവത്തിൽ വലിയ പ്രതിഷേധവുമായി ജനങ്ങൾ പൊലീസ്​ സ്​റ്റേഷന്​ പുറത്ത്​ പ്രതിഷേധിച്ചതോടെ പ്രതികൾക്കെതിരെ കേസെടുത്തിരുന്നു.