കേരളത്തിൽ നിന്ന്​ കൊങ്കണിലെത്തിയയാൾക്ക്​ കോവിഡ്​; കൊങ്കൺ വരെ യാത്ര നേത്രാവതിയിൽ

മുംബൈ: കേരളത്തിൽ നിന്ന്​ കൊങ്കണിലെത്തിയയാൾക്ക്​ ഞായറാഴ്​ച​ കോവിഡ്​ സ്​ഥിരീകരിച്ചു​. കൊങ്കൺ മേഖലയിലെ ആദ്യ മലയാളി കോവിഡ്​ രോഗിയാണിയാൾ. വെള്ളിയാഴ്​ച കേരളത്തിൽ നിന്ന്​ മുംബൈയിലേക്ക്​ പുറപ്പെട്ട നേത്രാവതി എക്​സ്​പ്രസിലെ എസ്​ എട്ട്​ കോച്ചിലെ യാത്രക്കാരനാണിയാളെന്ന്​​ മഹാരാഷ്​ട്രയിലെ മലയാളികളുടെ കൂട്ടായ്​മയിലുള്ള കോവിഡ്​ ഹെൽപ്​ ഡെസ്​ക്​ പ്രവർത്തകർ അറിയിച്ചു.

ഇൗ യാത്രക്കാരൻ ഉൾപ്പെടെ 12 മലയാളികൾക്കാണ്​ ഞായറാഴ്​ച മഹാരാഷ്​ട്രയിൽ കോവിഡ്​ സ്​ഥിരീകരിച്ചത്​. ഇതോടെ കോവിഡ്​ ബാധിച്ച മലയാളികളുടെ എണ്ണം 88 ആയി. ഇതിൽ മലയാളി നഴ്​സുമാരും അവരിൽ ചിലരുടെ കുടുംബാംഗങ്ങളുമുണ്ട്​.

വെള്ളിയാഴ്​ച നേത്രാവതിയുടെ എസ്​ എട്ട്​ കോച്ചിൽ കേരളത്തിൽ നിന്ന്​ പുറപ്പെട്ട്​ ശനിയാഴ്​ച മുംബൈയിൽ എത്തിയ എല്ലാവരും ബന്ധപ്പെടുകയൊ പരിശോധന നടത്തുകയൊ ചെയ്യണമെന്ന്​ ഹെൽപ്​ ഡസ്​കുമായി ബന്ധപ്പെട്ടവർ അറിയിച്ചു.