കോവിഡ്​ വാക്​സിന്​ പകരം ആന്‍റി റാബിസ്​ വാക്​സിൻ കുത്തിവെച്ചു; നഴ്​സിന്​ സസ്​പെൻഷൻ

മുംബൈ: കോവിഡ്​ വാക്​സിൻ സ്വീകരിക്കാ​െനത്തിയയാൾക്ക്​ ആന്‍റി റാബിസ്​ വാക്​സിൻ (എ.ആർ.വി) കുത്തിവെച്ച നഴ്​സിന്​ സസ്​പെൻഷൻ. താനെ മുനിസിപ്പൽ കോർപറേഷൻ പരിധിയിൽ തിങ്കളാഴ്​ചയാണ്​ സംഭവം.

കൽവയിലെ ആട്​കൊനേഷർ ഹെൽത്ത്​ സെന്‍ററിൽ കോവിഡ്​ വാക്​സിൻ സ്വീകരിക്കാനെത്തിയതായിരുന്നു രാജ്​കുമാർ. കോവിഷീൽഡ്​ വാക്​സിനായി രജിസ്റ്റർ ചെയ്യുകയും ചെയ്​തിരുന്നു. എന്നാൽ വാക്​സിൻ സ്വീകരിക്കാൻ നിന്ന നിരയിൽനിന്ന്​ മാറി ആന്‍റി റാബിസ്​ വാക്​സിൻ സ്വീകരിക്കാൻ നിന്നവരുടെ വരിയിൽ നിൽക്കുകയായിരുന്നു രാജ്​കുമാർ.

ഊഴമെത്തിയപ്പോൾ രാജ്​കുമാറിന്‍റെ കൈവശമുണ്ടായിരുന്ന രേഖകൾ പരിശോധിക്കാതെ ആന്‍റി റാബിസ്​ വാക്​സിൻ നഴസ്​ കുത്തിവെക്കുകയും ചെയ്​തു. കോവിഡ്​ വാക്​സിനല്ല ലഭിച്ചതെന്ന്​ മനസിലായതോടെ രാജ്​കുമാർ ആശുപത്രി അധികൃതരോട്​ വിവരം പറഞ്ഞു. ഇതോടെ രാജ്​കുമാറിനെ നിരീക്ഷണത്തിലാക്കിയശേഷം നഴ്​സിനെ സസ്​പെൻഡ്​ ചെയ്​തു.

വാക്​സിൻ നൽകുന്നതിന്​ മുമ്പ്​ സ്വീകരിക്കാനെത്തുന്നയാളുടെ​ രേഖകൾ കൃത്യമായി പരിശോധിക്കണമെന്ന്​ താനെ മുനിസിപ്പൽ കോർപറേഷൻ അറിയിച്ചു.