യു.പിയിൽ നടുറോഡിൽ ​കസേരയിട്ടിരുന്നയാളെ ട്രക്ക് ഇടിച്ച് തെറിപ്പിച്ചു -വിഡിയോ

​ലഖ്നോ: യു.പിയിൽ നടുറോഡിൽ കസേരയിട്ടിരുന്നയാളെ ട്രക്ക് ഇടിച്ച് തെറിപ്പിച്ചു. കനത്ത മഴക്കിടയിലാണ് യുവാവ് നടുറോഡിൽ കസേരയിട്ടിരുന്നത്. ഇയാൾ റോഡിൽ കസേരയിട്ട് ഇരിക്കുന്നതിന്റെ ദൃശ്യങ്ങൾ പുറത്ത് വന്നിട്ടുണ്ട്. 17 സെക്കൻഡ് ദൈർഘ്യമുള്ള വി​ഡിയോയാണ് പുറത്ത് വന്നത്. ഇയാളെ റോഡിലൂടെ പോകുന്ന ലോറി ഇടിച്ചിടുന്നതും കാണാം.

യു.പിയിലെ പ്രതാപ്ഗാർഹിലാണ് സംഭവമുണ്ടായത്. ഷോർട്സ് മാത്രം ധരിച്ച് പൊലീസ് ചെക്ക് പോസ്റ്റിനടുത്താണ് ഇയാൾ കസേരയിട്ട് ഇരുന്നത്. ഇയാളെ മാറ്റാൻ ആരും ​ശ്രമിച്ചിരുന്നില്ല. ഇതിനിടെ റോഡിലൂടെയെത്തിയ ട്രക്ക് ഇയാളെ ഇടിച്ചിടുകയായിരുന്നു.

ഇടിയുടെ ആഘാതത്തിൽ കസേരയിലിരുന്നയാൾ താ​ഴേക്ക് വീണുവെങ്കിലും പരിക്കേൽക്കാതെ രക്ഷപ്പെട്ടു. തുടർന്ന് ട്രക്ക് നിർത്താതെ പോവുകയായിരുന്നുവെന്നും പൊലീസ് പറഞ്ഞു. സംഭവത്തിന്റെ വിഡിയോ സമൂഹമാധ്യമങ്ങളിൽ വൈറലായതോടെ പൊലീസ് സ്വമേധയ കേസെടുത്തു.

അന്വേഷണത്തിൽ യുവാവിന്റെ കുടുംബാംഗങ്ങൾ ഇയാൾക്ക് മാനസികാസ്വാസ്ഥമുള്ളതായി സമ്മതിച്ചുവെന്ന് പൊലീസ് അറിയിച്ചു. കേസിലെ നിയമനടപടികൾ തുടരുകയാണെന്നും ഉദ്യോഗസ്ഥർ വ്യക്തമാക്കി.