മൗദൂദി-ഖുതുബ് പുസ്തക​ വിവാദം ജനശ്രദ്ധ തിരിച്ചുവിടാൻ: ജമാഅത്ത്​ ഉപാധ്യക്ഷൻ ​

ന്യൂഡൽഹി: രാജ്യത്തിന്‍റെ മുഖ്യവിഷയങ്ങളിൽ നിന്ന്​ ജനങ്ങളുടെ ശ്രദ്ധ വഴി തിരിച്ചുവിടുന്നതിനുണ്ടാക്കിയ വിവാദങ്ങളിലൊന്നാണ്​ സയ്യിദ്​ അബുൽ അഅ്​ലാ മൗദൂദിയുടെയും സയ്യിദ്​ ഖുതുബിന്‍റെയും പുസ്തകങ്ങളെ കുറിച്ചുള്ള വിവാദമെന്ന്​ ജമാഅത്തെ ഇസ്​ലാമി ഹിന്ദ്​ ഉപാധ്യക്ഷൻ മുഹമ്മദ്​ സലീം വാർത്താസ​മ്മേളനത്തിൽ പറഞ്ഞു. അത്​ കൊണ്ടാണ്​ അ​തൊരു വലിയ ചർച്ചയാക്കാത്തതെന്നും അദ്ദേഹം കൂട്ടിച്ചേർത്തു.

വൈകാരികമായ വിഷയങ്ങളിൽ ജനങ്ങളെ തളച്ചിട്ട്​ അടിസ്ഥാന വിഷയങ്ങൾ അവർ ശ്രദ്ധിക്കാത്ത സാഹചര്യം സൃഷ്​ടിക്കുകയാണ്​ ചെയ്യുന്നത്​. അക്കാദമിക തലത്തിലുള്ള ഒരു വിഷയമാണിത്​.അക്കാദമിക്​ തലത്തിൽ ഏത്​ വിഷയം പഠിപ്പിക്കണമെന്നത്​ അതിന്‍റെ സർവകലാശാലയും അക്കാദമിക്​ കൗൺസിലും ചേർന്ന്​ തീരുമാനിക്കേണ്ടതാണ്​. അവർ അത്​​ പലപ്പോഴും മാറ്റുന്നതും സാധാരണ നടപടിയാണ്​. എന്നിട്ടും ചിലയാളുകൾ പ്രധാനമ​ന്ത്രിക്ക്​ കത്തെഴുതി അതിനെ വൈകാരികമാക്കാനുള്ള ശ്രമം നടത്തി. ഒരു പ്രശ്നമല്ലാത്ത കാര്യത്തെ വലിയ പ്രശ്നമാക്കി മാറ്റാനുള്ള ശ്രമമാണ്​ ഇതിലൂടെ നടത്തിയത്​.

ഇത്തരത്തിൽ രാജ്യത്തിന്‍റെ അടിസ്ഥാന വിഷയങ്ങളിൽ ജനശ്രദ്ധ തിരിച്ചുവിടാൻ അനുവദിക്കരുത്​. ആ വിഷയത്തിന്​ അതർഹിക്കുന്ന പ്രതികരണം ജമാഅത്ത്​ നൽകിയിട്ടുണ്ട്​ എന്നും മുഹമ്മദ്​ സലീം കൂട്ടിച്ചേർത്തു. രാജ്യത്ത്​ ജനാധിപത്യം അപകടത്തിലാണ്​. മതിയായ ചർച്ചയില്ലാതെയാണ്​ പ്രധാന നിയമങ്ങൾ പോലും പാസാക്കിയെടുക്കുന്നത്​. വിലക്കയറ്റവും അവശ്യ സാധനങ്ങളുടെ ജി.എസ്​.ടി നിരക്കുവർധനയും ജനജീവിതം ദുസ്സഹമാക്കിയിരിക്കുകയാണ്​. ഗ്രാമീണ ഇന്ത്യക്ക്​ ഏറെ ആശ്വാസമായിരുന്ന തൊഴിലുറപ്പ്​ പദ്ധതിക്ക്​ മതിയായ തുക അനുവദിക്കാത്തത്​ മൂലം തൊഴിലാളികൾക്ക്​ വേതനം കൊടുക്കുന്നില്ല. 2014ന്​ ശേഷം ഒമ്പത്​ ലക്ഷത്തിലേറെ പേർ വിദേശ പൗരത്വം സ്വീകരിച്ചത്​ തങ്ങളുടെ മക്കുടെ ഭാവിയിൽ അവർക്കുള്ള ആത്​മവിശ്വാസക്കുറവാണ്​ കാണിക്കുന്നതെന്ന്​ മുഹമ്മദ്​ സലീം ചൂണ്ടിക്കാട്ടി.

സ്വാതന്ത്ര്യ ലബ്​ധി തൊട്ട്​ നാമുയർത്തുന്ന ത്രിവർണ പതാക രാജ്യത്തിന്‍റേതാണ്​എന്ന്​ ആർക്കാണറിയാത്തതെന്ന്​ 'ഹർ ഘർ തിരംഗ'യുമായി ബന്ധപ്പെട്ട ചോദ്യത്തോട്​ മുഹമ്മദ്​ സലീം പ്രതികരിച്ചു. 'ഹർ ഘർ തിരംഗ'യും ഇത്​ പോലെ രാജ്യത്തെ യഥാർഥ പ്രശ്നങ്ങളിൽ നിന്ന്​ തിരിച്ചുവിടാനുളള ശ്രമമാണ്​. ഒരു ഭരണകൂടത്തെ ജനങ്ങൾ തെരഞ്ഞെടുക്കുന്നത്​ വിലക്കയറ്റം, തൊഴിലില്ലായ്മ തുടങ്ങി അവിടുത്തെ ജനങ്ങളുടെ പ്രശ്നങ്ങൾ പരിഹരിക്കുന്നതിനാണ്​. എല്ലാ വീട്ടിലുമല്ല, എല്ലാ മനസിലും ത്രിവർണ പതാകയുണ്ടെന്നും എന്നാൽ എല്ലാ വീട്ടിലും തൊഴിലാണ്​ വേണ്ടതെന്നും ജമാഅത്തെ ഇസ്​ലാമി ഉപാധ്യക്ഷൻ എസ്​. അമീനുൽ ഹസൻ പറഞ്ഞു.