ജനാഭിലാഷം പൂർത്തിയാക്കാൻ കോൺഗ്രസിന് സാധിക്കട്ടെ; അഭിനന്ദിച്ച് മോദി

ന്യൂഡൽഹി: കർണാടക തെീരഞ്ഞെടുപ്പിൽ വലിയ ഭൂരിപക്ഷത്തോടെ വിജയിച്ച കോൺഗ്രസിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. ജനാഭിലാഷം നിറവേറ്റാൻ കോൺഗ്രസിന് സാധിക്കട്ടെയെന്ന് അദ്ദേഹം പറഞ്ഞു. തെരഞ്ഞെടുപ്പിൽ വിജയിച്ച കോൺഗ്രസിനെ അഭിനന്ദിക്കുകയാണ്.

ബി.ജെ.പിയെ പിന്തുണച്ച എല്ലാവരോടും നന്ദി പറയുന്നു. ബി.ജെ.പി പ്രവർത്തകരുടെ കഠിനാധ്വാനത്തെ അഭിനന്ദിക്കുന്നു. വരും തെരഞ്ഞെടുപ്പുകൾക്ക് ശേഷം കർണാടക വീണ്ടും ബി.ജെ.പി ഭരിക്കുമെന്നും മോദി പറഞ്ഞു. തെരഞ്ഞെടുപ്പ് ഫലം പുറത്ത് വന്നതിന് ശേഷം ഇതാദ്യമായാണ് മോദി പ്രതികരിക്കുന്നത്.

കർണാടക നിയമസഭ തെരഞ്ഞെടുപ്പിൽ വലിയ വിജയമാണ് കോൺഗ്രസിനുണ്ടായത്. 137 സീറ്റുകളിലാണ് കോൺഗ്രസ് ജയിച്ചത്. ബി.ജെ.പി 64 സീറ്റിൽ ഒതുങ്ങി. ജെ.ഡി.എസിന് 20 സീറ്റ് നേടാൻ മാത്രമേ സാധിച്ചുള്ളു. മറ്റുള്ളവർ മൂന്ന് സീറ്റിലും വിജയിച്ചു.