പ്രതിമ നിർമാണത്തിന്​ ചെലവഴിച്ച തുക തിരിച്ചടക്കണം -മായാവതിയോട്​ സുപ്രീംകോടതി

ന്യൂഡൽഹി: യു.പിയിൽ ബഹുജൻ സമാജ്​ പാർട്ടിയുടെ ചിഹ്​നമായ ആനയുടെ പ്രതിമ നിർമിക്കാൻ മായാവതി ചെലവഴിച്ച തുക തിരിച്ച ടക്കണമെന്ന്​ സുപ്രീംകോടതി. ലക്​നോവിലും നോയിഡയിലും ആനപ്രതിമകളും സ്വന്തം പ്രതിമയും നിർമിക്കാൻ മായാവതി പൊതുഖജനാവിലെ പണം ഉപയോഗിച്ചുവെന്നാണ്​ പ്രഥമിക നിഗമനമെന്നും​ കോടതി നിരീക്ഷിച്ച​ു.

രാഷ്​ട്രീയ പാർട്ടികളെ പ്രോത്​സാഹിപ്പിക്കുന്നതിനോ സ്വന്തം പ്രതിമകൾ നിർമിക്കുന്നതിനോ പൊതു ഖജനാവിലെ പണം ഉപയോഗിക്കാൻ പാടില്ലെന്ന്​ ചൂണ്ടിക്കാട്ടി ഒരു അഭിഭാഷകൻ നൽകിയ ഹരജിയിലാണ്​ കോടതിയുടെ നിർദേശം.

ചീഫ്​ ജസ്​റ്റിസ്​ രഞ്​ജൻ ഗൊഗോയ്​, ജസ്​റ്റിസ്​ ദീപക്​ ഗുപ്​ത, സഞ്​ജീവ്​ ഖന്ന എന്നിവരടങ്ങിയ ബെഞ്ചാണ്​ കേസ്​ പരിഗണിച്ചത്​. കേസിൽ കൂടുതൽ വാദം കേൾക്കണമെന്ന്​ പറഞ്ഞ കോടതി ഏപ്രിൽ രണ്ടിന്​ തീർപ്പ്​ കൽപ്പിക്കുമെന്നും അറിയിച്ചു.