ഹമാസിനെ തീവ്രവാദ സംഘടനയായി പ്രഖ്യാപിക്കുന്ന രേഖയിൽ ഒപ്പുവെച്ചിട്ടില്ലെന്ന് മീനാക്ഷി ലേഖി

ന്യൂഡൽഹി: ലോക്സഭയിലെ ചോദ്യത്തിന്​ സ്വന്തം പേരുവെച്ച്​ എഴുതി നൽകിയ മറുപടിയിൽ നിന്ന്​ കൈകഴുകി വിദേശകാര്യ സഹമന്ത്രി മീനാക്ഷി ലേഖി. ഇത്​ വിവാദത്തിന്​ വഴിവെച്ചപ്പോൾ തിരുത്തുമായി സർക്കാർ.

ഫലസ്തീനിലെ ഹമാസിനെ ഭീകര സംഘടനയായി പ്രഖ്യാപിക്കാൻ സർക്കാറിനു​ മുന്നിൽ എന്തെങ്കിലും നിർദേശമുണ്ടോ, ഇസ്രായേൽ ഭരണകൂടം ഇത്തരത്തിൽ ഒരാവശ്യം ഉന്നയിച്ചി​ട്ടുണ്ടോ എന്ന കെ. സുധാകരന്‍റെ ചോദ്യത്തിന്​, സർക്കാറിനുവേണ്ടി എഴുതി നൽകിയ മറുപടി മീനാക്ഷി ലേഖിയുടെ പേരിലായിരുന്നു. യു.എ.പി.എ പ്രകാരമാണ്​ ഒരു സംഘടനയെ ഭീകര സംഘടനയായി പ്രഖ്യാപിക്കുന്നത്​, ബന്ധപ്പെട്ട സർക്കാർ വകുപ്പുകളാണ്​ ഇക്കാര്യം പരിഗണിക്കുന്നത്​ എന്നായിരുന്നു മറുപടി.

എന്നാൽ, ഹമാസുമായി ബന്ധപ്പെട്ട ഒരു ചോദ്യത്തിനുള്ള മറുപടിയിലും താൻ ഒപ്പുവെച്ചിട്ടില്ലെന്നാണ്​ മീനാക്ഷി ലേഖി സമൂഹ മാധ്യമങ്ങളിൽ പ്രതികരിച്ചത്​. ഈ മറുപടി തയാറാക്കിയത്​ ആരാണെന്ന്​ അന്വേഷിക്കുമെന്നും കുറ്റക്കാർ ആരാണെന്ന്​ വെളിപ്പെടുമെന്നും മന്ത്രി കൂട്ടിച്ചേർത്തു. പാർലമെന്‍റ്​ ചോദ്യോത്തരത്തിന്‍റെ പകർപ്പും മറുപടിയും ‘എക്സി’ൽ പോസ്റ്റ്​ ചെയ്തതിനൊപ്പം പ്രധാനമന്ത്രി നരേന്ദ്ര മോദി, വിദേശകാര്യ മന്ത്രി എസ്​. ജയ്​ശങ്കർ എന്നിവരുടെ ശ്രദ്ധ മന്ത്രി ഇതിലേക്ക്​ ക്ഷണിക്കുകയും ചെയ്തു.

പാർലമെന്‍റിൽ സർക്കാർ നൽകുന്ന മറുപടി ആധികാരികമാണെന്നിരിക്കെ, അത്​ തെറ്റിയാൽ പാർലമെന്‍റിനെ തെറ്റിദ്ധരിപ്പിച്ചുവെന്ന പ്രശ്നം ഉയരും. മന്ത്രി അറിയാതെ എങ്ങനെ, ആര്​ മറുപടി നൽകിയെന്ന ചോദ്യമാണ്​ മീനാക്ഷി ലേഖിയുടെ വിശദീകരണത്തിന്​ പിന്നാലെ ഉയരുന്നത്​. പാർലമെന്‍റ്​ മറുപടി കൃത്രിമ രേഖയാണോ, വളച്ചൊടിച്ചതാണോ എന്ന്​ ശിവസേനയിലെ പ്രിയങ്ക ചതുർവേദി ചോദിച്ചു. അങ്ങനെയെങ്കിൽ ഗുരുതരമായ ചട്ടലംഘനമാണ്​ നടന്നിരിക്കുന്നതെന്നും പ്രിയങ്ക ചൂണ്ടിക്കാട്ടി.

പാർലമെന്‍റിലെ ചോദ്യത്തിനുള്ള മറുപടി തന്‍റേതല്ലെന്നുപറഞ്ഞ്​ മന്ത്രി കൈയൊഴിഞ്ഞത്​ സമൂഹ മാധ്യമങ്ങളിൽ ചർച്ചയായതോടെ വിദേശകാര്യ മന്ത്രാലയം വിശദീകരണ പ്രസ്​താവന ഇറക്കി. ‘ലോക്സഭയിലെ 980ാം നമ്പർ ചോദ്യത്തിനുള്ള മറുപടിയിൽ സാ​​ങ്കേതികമായ തിരുത്തൽ ആവശ്യമുണ്ട്​. വിദേശകാര്യ സഹമന്ത്രി വി. മുരളീധരനാണ്​ മറുപടി നൽകിയിട്ടുള്ളത്​. ഈ വിഷയത്തിൽ യുക്​തമായ നടപടി സ്വീകരിച്ചുവരുകയാണ്​’ -വിദേശകാര്യ മന്ത്രാലയ വക്​താവ്​ അരിന്ദം ബഗ്​ചി പറഞ്ഞു. മന്ത്രാലയ തലത്തിൽ അന്വേഷിച്ച്​ മറുപടി തേടാവുന്ന വിഷയം മീനാക്ഷി ലേഖി സ്വയം സമൂഹ മാധ്യമങ്ങളിലേക്ക്​ നൽകിയത്​ എന്തുകൊണ്ടാണെന്ന ചോദ്യം പക്ഷേ, ബാക്കിയായി.