മെഹബൂബ മുഫ്​തിയുടെ വീട്ടുതടങ്കൽ മൂന്നുമാസത്തേക്ക്​ കൂടി നീട്ടി

ശ്രീനഗർ: ജമ്മു കശ്​മീർ മുൻ മുഖ്യമന്ത്രിയും പി.ഡി.പി നേതാവുമായ മെഹബൂബ മുഫ്​തിയുടെ വീട്ടുതടങ്കൽ മൂന്നുമാസത്തേക്ക്​ കൂടി നീട്ടി. പൊതു സുരക്ഷ നിയമപ്രകാരം ആഗസ്​റ്റ്​ അഞ്ചുമുതൽ മെഹബൂബ മുഫ്​തി വീട്ടുതടങ്കലിൽ കഴിയുകയാണ്​. 

2019 ആഗസ്​റ്റ്​ അഞ്ചിന്​ സ്വയം ഭരണ പദവി നൽകുന്ന ആർട്ടിക്ക്​ൾ 370 റദ്ദാക്കുകയും ജമ്മു കശ്​മീരിനെ വിഭജിച്ച്​ രണ്ടുകേന്ദ്ര ഭരണ പ്രദേശങ്ങളാക്കി വിഭജിക്കുകയും ചെയ്​തിരുന്നു. ഇതിനുശേഷമാണ്​ മെഹബൂബ മുഫ്​തിയേയും മുതിർന്ന നേതാക്ക​ളെയും തടവിൽ പാർപ്പിച്ചത്​. 

കഴിഞ്ഞ മേയിൽ മെഹബൂബ മുഫ്​തിയുടെ തടങ്കൽ മൂന്നുമാസത്തേക്ക്​ കൂടി സർക്കാർ നീട്ടിയിരുന്നു. ഒൗദ്യോഗിക വസതിയായ ഫെയർ വ്യൂവിലാണ്​ ഇപ്പോൾ മുൻമുഖ്യമന്ത്രിയുടെ താമസം. നേരത്തേ ശ്രീനഗറിലെ എം.എ റോഡി​ലുള്ള വസതിയിൽ വീട്ടുതടങ്കലിലായിരുന്നു ഇവർ. ഏകദേശം ഒരു വർഷത്തോടടുക്കുന്നു മെഹബൂബ മുഫ്​തി വീട്ടുതടങ്കലിൽ കഴിയാൻ തുടങ്ങിയിട്ട്​. അതേസമയം മുൻ മുഖ്യമന്ത്രിമാരും ദേശീയ കോൺഫറൻസ്​ നേതാക്കളുമായ ഫാറൂഖ്​ അബ്​ദുല്ലയെയും മകൻ ഒമർ അബ്​ദുല്ലയേയും ഏഴുമാസത്തെ വീട്ടുതടങ്കലിന്​ ശേഷം വിട്ടയച്ചിരുന്നു.