ഗവർണറുടെ ചായ സത്ക്കാരം ബഹിഷ്​ക്കരിച്ച്​ സ്റ്റാലിനും മന്ത്രിമാരും

ചെന്നൈ: ഗവർണർ ആർ.എൻ രവിയുടെ ചായ സൽക്കാരം ബഹിഷ്​ക്കരിച്ച്​ ഡി.എം.കെ മുന്നണി. മന്ത്രിമാരായ തങ്കം തെന്നരസു, എം. സുബ്രമണ്യൻ എന്നിവരാണ്​​ ഇക്കാര്യം മാധ്യമ പ്രവർത്തകരെ അറിയിച്ചത്​.

രാജ്​ഭവനിൽ ചെന്ന്​ ഗവർണറെ നേരിൽ കണ്ട്​ തമിഴ്​നാട്​ സർക്കാറിന്‍റെ നിലപാട്​ അറിയിച്ചതായും തമിഴ്നാട് നിയമസഭയുടെ പ്രതിച്ഛായ തകർക്കാനാണ് ഗവർണർ ശ്രമിക്കുന്നതെന്നും ഇവർ മാധ്യമങ്ങളോട്​ പറഞ്ഞു. മുഖ്യമന്ത്രി എം.കെ സ്റ്റാലിനും മന്ത്രിമാരും ചടങ്ങിൽനിന്ന്​ വിട്ടുനിൽക്കും. ജനങ്ങളുടെ വികാരങ്ങളെ അവഹേളിക്കുന്ന തരത്തിലാണ്​ ഗവർണർ പ്രവർത്തിക്കുന്നതെന്നും മന്ത്രിമാർ ആരോപിച്ചു.

തമിഴ്​ പുതുവർഷാരംഭ ദിനമായ​ വ്യാഴാഴ്​ച വൈകീട്ടാണ്​ രാജ്​ഭവൻ അങ്കണത്തിൽ മഹാകവി സുബ്രമണ്യ ഭാരതിയാരുടെ പ്രതിമ അനാഛാദന ചടങ്ങും ഇതോടനുബന്ധിച്ച ചായ സത്​കാരവും നടന്നത്​. മുഖ്യമന്ത്രി എം.കെ സ്റ്റാലിനും മന്ത്രിമാർക്കും രാഷ്ട്രീയകക്ഷി പ്രതിനിധികൾക്കും നിയമസഭ- പാർലമെന്‍റ്​ അംഗങ്ങൾക്കുമാണ്​ ക്ഷണമുണ്ടായിരുന്നത്​.

എന്നാൽ പരിപാടി ബഹിഷ്​ക്കരിക്കുമെന്ന്​ ഡി.എം.കെ സഖ്യകക്ഷികളായ കോൺഗ്രസ്​, സി.പി.എം, സി.പി.ഐ, വിടുതലൈ ശിറുതൈകൾ കക്ഷി, മനിതനേയ മക്കൾ കക്ഷി നേരത്തെ പ്രഖ്യാപിച്ചിരുന്നു. അതേസമയം പ്രതിപക്ഷ കക്ഷികളായ അണ്ണാ ഡി.എം.കെയും ബി.ജെ.പിയും ഗവർണറുടെ വിരുന്നിൽ പ​ങ്കെടുക്കുമെന്ന്​ അറിയിച്ചു.

നീറ്റ് റദ്ദാക്കൽ ഉൾപ്പെടെ മൊത്തം പത്തിലധികം ബില്ലുകൾക്ക് ഗവർണർ അംഗീകാരം നൽകാത്തതാണ്​ തീരുമാനത്തിന്​ കാരണമായത്​. സർക്കാറിന്‍റെ നയങ്ങൾക്ക്​ വിരുദ്ധമായി ഗവർണർ പൊതുചടങ്ങുകളിൽ പ്രസ്താവന നടത്തിയിരുന്നത്​ ഡി.എം.കെ കേന്ദ്രങ്ങളിൽ അസ്വസ്ഥത പടർത്തിയിരുന്നു. ചില സർവകലാശാലകളിലെ ​വൈസ്​ ചാൻസലർ നിയമനങ്ങളിലും ഗവർണർ ഏകപക്ഷീയമായ തീരുമാനമെടുത്തതിൽ ഭരണമുന്നണിക്ക്​ കടുത്ത അസംതൃപ്തിയുണ്ട്​. തമിഴ്നാട് ഗവർണറെ ഉടൻ പിൻവലിക്കണമെന്ന് പാർലമെന്‍റിൽ ഈയിടെ ഡി.എം.കെ എം.പിമാർ ആവശ്യപ്പെട്ടിരുന്നു.