ചെന്നൈ തുറമുഖത്ത് നിന്ന്​ വിനോദ സഞ്ചാര ആഡംബര കപ്പൽ സർവീസ്​ സ്റ്റാലിൻ ഫ്ലാഗ്​ഓഫ്​ ചെയ്തു

ചെന്നൈ: ആഭ്യന്തര-വിദേശ വിനോദ സഞ്ചാരികളെ ആകർഷിക്കുകയെന്ന ലക്ഷ്യ​ത്തോടെ ചെന്നൈ തുറമുഖത്ത് നിന്ന് പുതുതായി ആരംഭിച്ച ആഡംബര ക്രൂയിസ് കപ്പൽ സർവീസ് മുഖ്യമന്ത്രി എം.​കെ സ്റ്റാലിൻ ഫ്ലാഗ്​ഓഫ്​ ചെയ്തു. തമിഴ്​നാട്​ വിനോദ സഞ്ചാര വകുപ്പും കോർഡെലിയ ക്രൂയിസ്​ കമ്പനിയും ചേർന്നാണ്​ കപ്പൽ യാത്ര ഒരുക്കുന്നത്​.

ചെന്നൈ തുറമുഖത്തു നിന്ന് പുതുച്ചേരിയിലേക്കും തിരിച്ചു ചെന്നൈ തുറമുഖത്തേക്കുമായി രണ്ടുദിവസത്തെയും ചെന്നൈ തുറമുഖത്തു നിന്ന് വിശാഖപട്ടണത്തിലേക്കും അവിടെ നിന്ന് പുതുച്ചേരിയിലേക്കും തിരിച്ച് ചെന്നൈയിലേക്കുമായി അഞ്ച്​ ദിവസം എന്നിങ്ങനെ രണ്ട് പാക്കേജുകളിലായാണ് ആഡംബരക്കപ്പൽ സർവീസ് നടത്തുക.

700 അടി നീളമുള്ള കപ്പലിൽ 11 നിലകളിലായി മൊത്തം 796 മുറികളുണ്ട്. ഇവ കൂടാതെ നാല്​ വലിയ മൾട്ടി ക്യുസിൻ റെസ്റ്റോറന്‍റുകൾ, ഒരു ബാർ, ഒരു ജിം, ഒരു സ്പാ, ഒരു മസാജ് സെന്‍റർ, നീന്തൽക്കുളം, കുട്ടികളുടെ കളിസ്ഥലം എന്നിങ്ങനെയുള്ള വൈവിധ്യമാർന്ന വിനോദ സൗകര്യങ്ങളുണ്ട്. ഒരേ സമയം ആയിരം പേർക്ക് ഇരിക്കാവുന്ന ഗാലറിയുമുണ്ട്​. 1500 മുതൽ 2000 വരെ യാത്രക്കാരും 800 ജീവനക്കാരും കപ്പലിൽ ഉണ്ടാകും.

ആദ്യഘട്ടത്തിൽ ഒരു കപ്പൽ മാത്രമാണ്​ സർവീസ്​ നടത്തുക. 2025ഓടെ മൂന്നെണ്ണം കൂടി കമീഷൻ ചെയ്യുമെന്നും ടൂറിസം അധികൃതർ അറിയിച്ചു.