145 ദിവസങ്ങൾക്ക്​ ശേഷം കാർഗിലിൽ ഇൻറർനെറ്റ്​ പുനഃസ്ഥാപിച്ചു

ന്യൂഡൽഹി: 145 ദിവസങ്ങൾക്ക്​ ശേഷം കാർഗിലിൽ മൊബൈൽ ഇൻറർനെറ്റ്​ പുനഃസ്ഥാപിച്ചു. ആർട്ടിക്കൾ 370 റദ്ദാക്കുന്നതിന്​ മുന്നോടിയായി പിൻവലിച്ച സേവനങ്ങളാണ്​ ഇപ്പോൾ പുനഃസ്ഥാപിച്ചിരിക്കുന്നത്​. ആഗസ്​റ്റ്​ അഞ്ചിനാണ്​ ഇൻറർനെറ്റ്​ സേവനം റദ്ദാക്കിയത്​.

കാർഗിലിൽ ​ക്രമസമാധാനില സാധാരണനിലയിലായതി​​​െൻറ പശ്​ചാത്തലത്തിലാണ്​ മൊബൈൽ ഇൻറർനെറ്റ്​ സേവനം പുനഃസ്ഥാപിക്കുന്നതെന്ന്​ അധികൃതർ അറിയിച്ചു. ജനങ്ങൾ സേവനം ദുരുപയോഗം ചെയ്യില്ലെന്ന്​ മതനേതാക്കൾ ഉറപ്പ്​ നൽകിയതായും അവർ വ്യക്​തമാക്കി. അതേസമയം, കാർഗിലിൽ ബ്രോഡ്​ബാൻഡ്​ സേവനം നേരത്തെ മുതൽ ലഭ്യമാണ്​.

ആർട്ടിക്കൾ 370 റദ്ദാക്കുന്നതിന്​ മുന്നോടിയായി ജമ്മു കശ്​മീരിൽ മൊബൈൽ, ലാൻഡ്​ലൈൻ, ബ്രോഡ്​ബാൻഡ്​ ഇൻറർനെറ്റ്​ സേവനങ്ങൾ സർക്കാർ റദ്ദാക്കിയിരുന്നു. ഉമർ അബ്​ദുല്ല, മെഹ്​ബൂബ മുഫ്​തി തുടങ്ങി മുൻ മുഖ്യമന്ത്രിമാരെ തടവിലാക്കുകയും ചെയ്​തിരുന്നു.