അഫ്​ഗാനിലെ സ്​ഥിതിഗതികൾ വിശദീകരിക്കാൻ മോദിയുടെ നിർദേശം; പ്രധാനമന്ത്രിക്ക്​ സംസാരിക്കാൻ കഴിയാത്തതെന്തെന്ന്​ രാഹുൽ

ന്യൂഡൽഹി: അഫ്ഗാനിസ്​താനിലെ സംഭവവികാസങ്ങളെക്കുറിച്ചും ഇന്ത്യക്കാരെ തിരിച്ച്​ കൊണ്ടുവരുന്നതുമായും ബന്ധപ്പെട്ട നടപടികൾ വിവിധ രാഷ്​ട്രീയ പാർട്ടികളുടെ നേതാക്കളെ അറിയിക്കണമെന്ന് പ്രധാനമന്ത്രി നരേന്ദ്ര മോദി വിദേശകാര്യ മന്ത്രാലയത്തോട് ആവശ്യപ്പെട്ടതായി വിദേശകാര്യ മന്ത്രി എസ്. ജയശങ്കർ അറിയിച്ചു. അഫ്ഗാനിസ്​താനിൽ കുടുങ്ങിക്കിടക്കുന്ന ഇന്ത്യൻ പൗരന്മാരെ ഇന്ത്യ ഒഴിപ്പിക്കൽ തുടരുകയാണ്​. കാബൂളിൽനിന്ന് പ്രതിദിനം രണ്ട് വിമാനങ്ങൾ പ്രവർത്തിപ്പിക്കാൻ അനുവാദമുണ്ട്.

ഹിന്ദുക്കൾക്കും സിഖുകാർക്കും സഹായം ആവശ്യമുള്ള അഫ്ഗാനിസ്​താനിലെ സുഹൃത്തുക്കൾക്കും സഹായം നൽകുമെന്ന് ഇന്ത്യ ഉറപ്പ് നൽകിയിട്ടുണ്ട്​. ഇതിന്​ പിന്നാലെയാണ്​ ഇക്കാര്യങ്ങൾ വിശദീകരിക്കാൻ പ്രധാനമന്ത്രി നിർദേശിച്ചത്​.

'അഫ്ഗാനിസ്​താനിലെ സംഭവവികാസങ്ങൾ കണക്കിലെടുത്ത്, സഭയിലുള്ള രാഷ്​ട്രീയ പാർട്ടികളുടെ നേതാക്കളോട് വിദേശകാര്യ മന്ത്രാലയം കാര്യങ്ങൾ വിശദീകരിക്കാൻ പ്രധാനമന്ത്രി നരേന്ദ്ര മോദി നിർദേശിച്ചു. പാർലമെന്‍ററികാര്യ മന്ത്രി പ്രഹ്ലാദ് ജോഷി കൂടുതൽ വിവരങ്ങൾ അറിയിക്കും' -വിദേശകാര്യ മന്ത്രി ജയശങ്കർ ട്വീറ്റ് ചെയ്തു.

എന്നാൽ, ഇതിനെതിരെ കോൺഗ്രസ്​ നേതാവ്​ രാഹുൽ ഗാന്ധി രംഗത്തുവന്നു. എന്തുകൊണ്ടാണ് പ്രധാനമന്ത്രിക്ക് പ്രതിപക്ഷ നേതാക്കളെ കണ്ട്​ കാര്യങ്ങൾ വിശദീകരിക്കാൻ കഴിയാത്തതെന്ന് രാഹുൽ ഗാന്ധി ചോദിച്ചു. അഫ്ഗാനിസ്​താനിൽ നടക്കുന്ന കാര്യങ്ങൾ സംബന്ധിച്ച് അദ്ദേഹത്തിന്​​ അറിവില്ലാത്തതിനാലാണോ എന്നും രാഹുൽ കുറിച്ചു.

ഞായറാഴ്ച 107 ഇന്ത്യക്കാർ ഉൾപ്പെടെ 168 യാത്രക്കാരെ വിമാനത്തിൽ എത്തിച്ചിരുന്നു. ഇവരിൽ രണ്ട് അഫ്ഗാൻ സെനറ്റർമാരും ഉണ്ടായിരുന്നു. എയർ ഇന്ത്യ, ഇൻഡിഗോ, വിസ്താര എന്നിവയും സർവിസ്​ നടത്തുന്നുണ്ട്​.