സാധാരണക്കാരുടെ പോക്കറ്റ്​ കൊള്ളയടിച്ച്​ സുഹൃത്തുക്കളുടെ പോക്കറ്റ്​ നിറക്കലാണ്​ മോദിയുടെ മഹത്തായ പ്രവർത്തനം -രാഹുൽ

ന്യൂഡൽഹി: രാജ്യത്ത്​ കുതിച്ചുയരുന്ന ഇന്ധനവില വർധനവിനെതിരെ പ്രധാനമന്ത്രി നരേന്ദ്രമോദിക്കെതിരെ വിമർശനവുമായി കോൺഗ്രസ്​ നേതാവ്​ രാഹുൽ ഗാന്ധി. സാധാരണക്കാരുടെ പോക്കറ്റ്​ കൊള്ളയടിച്ച്​ മോദി സുഹൃത്തുക്കളുടെ പോക്കറ്റ്​ നിറക്കുകയാണെന്ന്​ അദ്ദേഹം പറഞ്ഞു.

ഉയർന്ന നികുതി പെട്രോളിനും ഡീസലിനും ഈടാക്കി ജനങ്ങളെ പിഴിയുകയാണെന്ന്​ കോൺഗ്രസ്​ അഭിപ്രായപ്പെട്ടിരുന്നു. ഇതിൽനിന്ന്​ സർക്കാർ പിന്തിരിയണമെന്നും കോൺഗ്രസ്​ ആവശ്യപ്പെട്ടു.

'പെട്രോൾ പമ്പിലെത്തി കാറിൽ ഇന്ധനം നിറക്കു​േമ്പാൾ വേഗത്തിൽ മീറ്റർ കറങ്ങു​േമ്പാൾ ഓർക്കണം അസംസ്​കൃത എണ്ണവില കൂടുകയോ കുറയുകയോ ചെയ്​തിട്ടില്ല. പെട്രോൾ​ ലിറ്ററിന്​ 100 രൂപയും. നിങ്ങളുടെ പോക്കറ്റുകൾ കൊള്ളയടിച്ച്​ സുഹൃത്തുക്കളുടെ പോക്കറ്റ്​ നിറക്കലാണ്​ മോദി സർക്കാർ ചെയ്യുന്ന മഹത്തായ പ്രവർത്തനം' -രാഹുൽ ഗാന്ധി ട്വീറ്റ്​ ചെയ്​തു.

കഴിഞ്ഞ രണ്ടാഴ്ചയായി രാജ്യത്ത്​ എണ്ണവില കുതിച്ചുയരുകയാണ്​. രാജസ്​ഥാനിലും മധ്യപ്രദേശിലും പെട്രോൾ ലിറ്ററിന്​ നൂറു കടന്നിരുന്നു. എന്നാൽ, എണ്ണവില ഉയരുന്നത്​ യു.പി.എ സർക്കാറിന്‍റെ തെറ്റായ നയങ്ങളാണെന്നായിരുന്നു കേന്ദ്രത്തിന്‍റെ വാദം.