അസമും ബംഗാളും പ്രളയത്തിൽ, മരണം  ഉയരുന്നു

ഗുവാഹതി/കൊൽക്കത്ത: അസമും പശ്ചിമബംഗാളും പ്രളയത്തി​​െൻറ പിടിയിൽ. അസമിൽ 11 പേർ കൂടി മരിച്ചതോടെ ഇൗ കാലവർഷത്തിലുണ്ടായ വെള്ളപ്പൊക്കത്തിൽ മരണസംഖ്യ 39 ആയി. പശ്ചിമബംഗാളിൽ 50 പേരാണ്​ മരിച്ചത്​. 160 ഗ്രാമങ്ങളിൽ 20 ലക്ഷം പേർ ദുരിതത്തിലാണ്​.അസമിലെ 24 ജില്ലകളിൽ 33.45 ലക്ഷം പേർ കൊടുംദുരിതത്തിലാണ്​. ഇൗ വർഷം സംസ്​ഥാനത്തുണ്ടായ വെള്ളപ്പൊക്കത്തിൽ 123 പേർക്കാണ്​ ജീവൻ നഷ്​ടമായത്​. ദുരിതാശ്വാസത്തെക്കുറിച്ച്​ പ്രധാനമന്ത്രിയുമായി ചർച്ചചെയ്യാൻ മുഖ്യമന്ത്രി സർബാനന്ദ സോണോവാൽ ഡൽഹിക്ക്​ പോയി.

അസമിൽ 2970 ​ഗ്രാമങ്ങൾ വെള്ളത്തിലാണ്​. 1.43 ലക്ഷം ഹെക്​ടറിലെ കൃഷിനശിച്ചു. 21 ജില്ലകളിൽ 304 ദുരിതാശ്വാസ കേന്ദ്രങ്ങളിലായി 1,38,648 പേരാണ്​ കഴിയുന്നത്​. 4600 പേരെ മാറ്റിപ്പാർപ്പിച്ചിട്ടുണ്ട്​. ചിറാങ്​, ബിശ്വനാഥ്​ ജില്ലകളെയൊന്നാകെ പ്രളയം ഒഴുക്കിക്കൊണ്ടുപോയി. ഗുവാഹതി, ​േജാർഹത്​, സോണിത്​പുർ, ഗോൾപാറ, ധുബ്രി എന്നിവിടങ്ങളിൽ ബ്രഹ്​മപുത്ര നദി അപകടകരമാംവിധം കരകവിഞ്ഞൊഴുകുകയാണ്​. കാസിരംഗ ദേശീയോദ്യാനത്തിലെ മിക്കവാറും ​പ്രദേശങ്ങൾ വെള്ളത്തിലാണ്​.

ബംഗാളിലെ വടക്കൻ-തെക്കൻ മേഖല വെള്ളത്തിലാണ്​. ബങ്കുറയിൽ സംസ്​ഥാനത്തെ റെക്കോഡ്​ മഴ രേഖപ്പെടുത്തി; 274 മി.മീറ്റർ. ശീലാബതി, ദ്വാരകേശ്വർ, ദ്വാരക, ക​ുയേ നദികൾ കരകവിഞ്ഞൊഴുകുകയാണ്​. ദാമോദർവാലി കോർപറേഷൻ അണക്കെട്ടിൽനിന്ന്​ വെള്ളം തുറന്നുവിട്ടതോടെയാണ്​ വെള്ളപ്പൊക്കം അതിരൂക്ഷമായത്​.

സംസ്​ഥാനത്തെ 10,82,285 ഹെക്​ടറിൽ 1,79,321 ഹെക്​ടറിലെ നെൽകൃഷി നശിച്ചു. 2,02,957 ഹെക്​ടറി​െല കൃഷിഭൂമി ഒലിച്ചുപോയി. 7868 വീടുകൾ പൂർണമായും തകർന്നു. സംസ്​ഥാനത്തെ 14 ജില്ലകളിലെ 27 ലക്ഷം പേരാണ്​ പ്രളയക്കെടുതിക്കിരയായത്​. 311 ക്യാമ്പുകളിൽ 47,000 പേരാണ്​ കഴിയുന്നത്​. മൃഗങ്ങൾക്കുള്ള ക്യാമ്പുകളിൽ 16,000ലേറെ മൃഗങ്ങളെയാണ്​ പാർപ്പിച്ചിരിക്കുന്നത്​. 
മുഖ്യമന്ത്രി മമത ബാനർജി പ്രളയബാധിത പ്രദേശങ്ങൾ സന്ദർശിച്ചു.