മധ്യപ്രദേശിൽ കോവിഡ്​ ഗവേഷണത്തിനായി റിസർച്ച്​ ഇൻസ്റ്റിറ്റ്യൂട്ട്​ ആരംഭിക്കുന്നു

ന്യൂഡൽഹി: കോവിഡ് ഉൾപ്പടെയുള്ള പകർച്ചവ്യാധികളെ പറ്റി ഗവേഷണത്തിനായി മധ്യപ്രദേശ് സർക്കാർ റിസർച്ച്​ ഇൻസ്റ്റിറ്റ്യൂട്ട്​ ആരംഭിക്കുന്നു. ഇത്​ സംബന്ധിച്ച്​ തീരുമാനമെടുത്തതായി ആരോഗ്യ-വിദ്യാഭ്യാസ മന്ത്രി വിശ്വാസ് സാരംഗ് പറഞ്ഞു.

ബ്ലാക്ക്​ ഫംഗസ് അണുബാധയാണ്​ ആദ്യഘട്ടത്തിൽ ഇന്‍സ്റ്റിറ്റ്യൂട്ടിൽ പരിശോധിക്കുക.ആരോഗ്യ വകുപ്പ്​ മുന്നോട്ട്​ വെച്ച ഈ മുഖ്യമന്ത്രി ശിവരാജ് സിംഗ് ചൗഹാൻ അംഗീകരിച്ചു.ഭോപ്പാലിലായിരിക്കും​ ഇൻസ്റ്റിറ്റ്യൂട്ടിന്‍റെ ആസ്ഥാനമെന്ന് മന്ത്രി പറഞ്ഞു. വിവിധ ഡിഗ്രി, ഡിപ്ലോമ കോഴ്സുകളും ഈ ഇൻസ്റ്റിറ്റ്യൂട്ട് നടത്തുമെന്നും വിവിധ മേഖലകളിലെ വിദഗ്​ധരെ നിയമിക്കുമെന്നും അദ്ദേഹം പറഞ്ഞു.

ഇതിനൊപ്പം സ്ത്രീകൾക്കിടയിലെ അർബുദം കണ്ടെത്താനായി മധ്യപ്രദേശിൽ പിങ്ക് പ്രചരണം നടത്താൻ സംസ്ഥാന സർക്കാർ തീരുമാനിച്ചതായി മന്ത്രി പറഞ്ഞു.കുടുംബ-സാമൂഹിക കാരണങ്ങൾ മൂലം സ്ത്രീകൾ കാൻസർ പോലുള്ള രോഗങ്ങളെക്കുറിച്ച് തുറന്നുപറയുന്നില്ല. സ്ത്രീകളുടെ ആരോഗ്യം പരിശോധിക്കാനായി നഗരപ്രദേശങ്ങളിലും ചെറിയ പട്ടണങ്ങളിലും പഞ്ചായത്ത് തലങ്ങളിലും ഒരു പിങ്ക് കാമ്പയിൻ തീരുമാനിച്ചതായും സർക്കാർ വൃത്തങ്ങൾ അറിയിച്ചു.