കുടുംബത്തിലെ മൂന്നുപേർ കോവിഡ്​ ബാധിച്ച്​ മരിച്ചു, രണ്ടുപേർ ഗുരുതരാവസ്​ഥയിൽ; മനംനൊന്ത്​ യുവതി ആത്മഹത്യ ചെയ്​തു

ഭോപാൽ: മധ്യപ്രദേശിൽ ഒരാഴ്ചക്കിടെ കുടുംബത്തിലെ മൂന്നുപേർ കോവിഡ്​ ബാധിച്ച്​ മരിച്ചതിന്​ പിന്നാലെ യുവതി ആത്മഹത്യ ചെയ്​തു. ദേവാസ്​ ജില്ലയിലാണ്​ സംഭവം.

യുവതിയുടെ കുടുംബത്തിലെ മൂന്നുപേർ കോവിഡ്​ ബാധിച്ച്​ ചികിത്സയിലായിരുന്നു. മൂന്നുപേരും ഒരാഴ്ചക്കിടെ മൂന്നുപേരും മരിച്ചു. ഇതിന്‍റെ മാനസിക വിഷമത്തിലായിരുന്നു യുവതി. ബുധനാഴ്ച യുവതിയെ വീട്ടിൽ തൂങ്ങിമരിച്ച നിലയിൽ കണ്ടെത്തുകയായിരുന്നുവെന്ന്​ പൊലീസ്​ പറഞ്ഞു.

പ്രഥമദൃഷ്​ട്യാ ആത്മഹത്യയാണെന്നും സംഭവത്തിൽ കൂടുതൽ അന്വേഷണം നടത്തുമെന്നും ദേവാസ്​ എസ്​.പി ശിവ്​ ദയാൽ പറഞ്ഞു.

യുവതിയുടെ ഭർത്താവ്​ സ്വപ്​നീഷ്​ ഗാർഗ്​, ഭർതൃസഹോദരൻ സഞ്​ജയ്​, ഭർതൃമാതാവ്​ ചന്ദ്രലേഖ എന്നിവർ ഇന്ദോറിലെ ആശുപത്രിയിൽ ചികിത്സയിലായിരുന്നു. ഏപ്രിൽ 14ന്​ ചന്ദ്രലഖയും ഏപ്രിൽ 17ന്​​ സഞ്​ജയ്​യും മരിച്ചു. ഏപ്രിൽ 19ന്​ യുവതിയുടെ ഭർത്താവ്​ സ്വപ്​നീഷും മരിച്ചു.

യുവതിയുടെ ഭർതൃപിതാവ്​ ബാൽകിഷൻ കോവിഡ്​ ബാധിച്ച്​ ഇന്ദോറിൽ വെന്‍റിലേറ്ററ​ിൽ ചികിത്സ തുടരുകയാണ്​. സഞ്​ജയ്​യുടെ മകനായ 12വയസുകാരനും ഗുരുതരാവസ്​ഥയിൽ ചികിത്സയിലാണെന്നും പൊലീസ്​ പറഞ്ഞു. യുവതിക്ക്​ രണ്ടു മക്കളുണ്ട്​.