മുംബൈയിൽ കോവിഡ്​ ബാധിതർ അര ലക്ഷം കടന്നു

മുംബൈ: സാമ്പത്തിക തലസ്​ഥാനമായ മുംബൈ നഗരത്തിൽ കോവിഡ്​ ബാധിതരുടെ എണ്ണം അര ലക്ഷം കടന്നു. തിങ്കളാഴ്​ച 1,311 പേർക്കാണ്​ പുതുതായി കോവിഡ്​ സ്​ഥിരീകരിച്ചത്​. 64 പേർ മരിക്കുകയും ചെയ്​തു. ഇതുൾപ്പെടെ മഹാരാഷ്​ട്രയിൽ 2,553 പേർക്ക്​​ പുതുതായി രോഗം സ്​ഥിരീകരിക്കുകയും 109 പേർ മരിക്കുകയും ചെയ്​തു.

ഇതോടെ കോവിഡ്​ ബാധിതരുടെ എണ്ണം​ മുംബൈയിലെ 50,085 അടക്കം സംസ്​ഥാനത്ത്​ 88,528 ആയി. മരണം മുംബൈയിലെ 1,702 ഉൾപടെ 3,169 ആയും ഉയർന്നു. 40,975 പേർ ഇതിനിടയിൽ രോഗമുക്​തരായതോടെ 44,384 പേരാണ്​ നിലവിൽ ചികിത്​സയിലുള്ളത്​.

കോവിഡ്​ വ്യപാനത്തിൽ നിന്ന്​ കരകയറുന്ന ധാരാവി ചേരിയിൽ തിങ്കളാഴ്​ച 12 പേർക്കാണ്​ കോവിഡ്​ സ്​ഥിരീകരിച്ചത്​. മരണമില്ല. ഇതുവരെ ധാരാവിയിൽ രോഗം ബാധിച്ചത്​ 1,914 പേർക്കാണ്​. 71 പേർ മരിച്ചു. ചേരിയിലെ ഏഴ്​ ലക്ഷം പേരെ പ്രാഥമിക പരിശോധനക്കും 5,350 പേരെ സ്രവ പരിശോധനക്കും വിധേയമാക്കിയിട്ടുണ്ട്.