മുംബൈയിൽ ജനം തെരുവിൽ; ലോക്​ ഡൗൺ ഇളവുകൾ പിൻവലിച്ചു

മുംബൈ: കോവിഡ്​ പ്രതിരോധ നടപടികൾ തകിടം മറിച്ച്​ ജനം തെരുവിലിറങ്ങിയതോടെ ലോക്​ ഡൗൺ ഇളവുകൾ മുംബൈ നഗരസഭ പിൻവലിച്ചു. ബുധനാഴ്​ച മുതൽ അത്യാവശ്യ ഗണത്തിൽ പെട്ട സ്​ഥാപനങ്ങൾ മാത്രമെ തുറക്കാൻ പാടുള്ളു. മദ്യ വിൽപന ശാലകളും അടച്ചിടണം. ലോക്​ ഡൗൺ ഇളവുകളുടെ ഭാഗമായി കോവിഡ്​ വ്യാപനത്തെ തുടർന്ന്​ പൂർണ്ണമായും അടച്ചുപൂട്ടിയ പ്രദേശങ്ങളിലൊഴികെ മദ്യ വിൽപന ശാലകൾ ഉൾപടെ ഒറ്റപ്പെട്ട കടകൾക്കും തിങ്കളാഴ്​ച മുതൽ തുറക്കാൻ അനുമതി നൽകിയിരുന്നു.

എന്നാൽ, സമൂഹിക അകൽച്ച പാലിക്കാതെ മദ്യ ശാലകൾക്ക്​ മുമ്പിൽ ജനം തിങ്ങികൂടിയത്​ പ്രതികലമായി. കോവിഡ്​ വ്യാപനം ക്രമാതീതമായി വർദ്ധിക്കുന്ന സാഹചര്യത്തിൽ ഇത്​ അനുവദിക്കാനകില്ലെന്ന്​ നഗരസഭ കമിഷണർ  പ്രവിൺ പർദേശി വ്യക്​തമാക്കി. ലോക്​ ഡൗൺ ഇളവുകൾ നൽകിയിരുന്നെങ്കിലും നിരോധനാജ്​ഞ പിൻവലിച്ചിരുന്നില്ല. അഞ്ചിൽ അധികം പേർ കൂടരുതെന്നാണ്​. എന്നാൽ, തിങ്കളാഴ്​ച മുതൽ ഇത്​ ലംഘിക്കപ്പെട്ടു. നഗരത്തിൽ ഇതുവരെ 9,945 പേർക്ക്​ കോവിഡ്​ ബാധിച്ചിട്ടുണ്ട്​. 387 പേർ മരിക്കുകയും ചെയ്​തു.