മകനെ വെള്ളത്തുണിയിൽ പൊതുഞ്ഞുകിടത്തി, മകളുടെ കഴുത്തിൽ കയറുകെട്ടി-അകന്നുകഴിയുന്ന ഭാര്യയെ വരുത്താൻ മക്കളു‌ടെ 'മരണമൊരുക്കി'യ യുവാവ്​ അറസ്റ്റിൽ

മുംബൈ: പിണങ്ങി കഴിയുന്ന ഭാര്യയെ 'പേടിപ്പിച്ച്​' വരുത്താൻ വീട്ടിൽ മക്കളുടെ 'മരണരംഗം' ഒരുക്കിയ യുവാവിനെ പൊലീസ്​ വധശ്രമകേസ്​ ചുമത്തി അറസ്റ്റ്​ ചെയ്​തു.​ മുംബൈ മലാഡ്​ ഈസ്റ്റിലെ പ്രാന്തപ്രദേശത്തുള്ള കുറാർ ഗ്രാമത്തിലായിരുന്നു സംഭവം. മക്കളുടെ മരണം കണ്ടാൽ ഭാര്യ ഉടൻ തിരികെ വരുമെന്ന പ്രതീക്ഷയിലാണ് ഇങ്ങനെ ചെയ്തതെന്നു പ്രതി സമ്മതിച്ചതായി പൊലീസ്​ പറഞ്ഞു.

ഇയാൾ മദ്യപിച്ച്​ ഭാര്യയെയും രണ്ട്​ മക്കളെയും ദേഹോപദ്രവം ചെയ്യുന്നത്​ പതിവായിരുന്നു. ഇതുമൂലം രണ്ട്​ വർഷം മുമ്പ്​ ഭാര്യ കുട്ടികളെയും കൊണ്ട്​ അവരുടെ ഗ്രാമത്തിലേക്ക്​ പോയി. കഴിഞ്ഞമാസം ഇയാൾ മക്കളെ തിരികെ കൊണ്ടുവന്നിരുന്നു. എന്നാൽ, ഭാര്യ ഇയാൾക്കൊപ്പം വരാൻ വിസമ്മതിച്ചു. ഭാര്യയെ വരുത്തുന്നതിനുവേണ്ടി ഇയാൾ മക്കളുടെ 'മരണം' ആവിഷകരിക്കുകയായിരുന്നെന്ന്​ സീനിയർ പൊലീസ്​ ഇൻസ​്​പെക്​ടർ പ്രകാശ്​ ബെ​െല പറഞ്ഞു.

ആഗസ്റ്റ്​ ഏഴിനായിരുന്നു സംഭവം. എട്ടുവയസ്സുള്ള മകന്‍റെ ശരീരം വെള്ളത്തുണി കൊണ്ട് പൊതിയുകയും ദഹിപ്പിക്കാൻ കൊണ്ടുപോകുന്നതുപോലെ ശരീരത്തിൽ പൂമാലകളും മറ്റു​ം വെക്കുകയും ചെയ്​തു. 13 വയസ്സുള്ള മകളെ കഴുത്തിൽ കയറുകുരുക്കി ബക്കറ്റിൽ കയറ്റി നിർത്തി. കയറിന്‍റെ മറ്റേയറ്റം സീലിങ് ഫാനിൽ കെട്ടുകയും ചെയ്​തു. ശേഷം മകളോട്​ ബക്കറ്റിൽനിന്നു ചാടാൻ പറഞ്ഞു. തന്നെ വിട്ടയയ്ക്കണമെന്നു മകൾ അപേക്ഷിച്ചെങ്കിലും അനുസരിച്ചില്ലെങ്കിൽ ഫാൻ ഓണാക്കി കൊല്ലുമെന്ന്​ ഇയാൾ ഭീഷണിപ്പെടുത്തി. പെൺകുട്ടിയുടെ നിലവിളി കേട്ട് സമീപവാസികൾ രക്ഷിക്കാൻ ഓടിയെത്തിയെങ്കിലും അവരെയെല്ലാം ഇയാൾ ചീത്ത പറഞ്ഞ്​ പുറത്താക്കി. ഒടുവിൽ അയൽവാസികൾ പൊലീസിൽ വിവരമറിയിച്ചു. പൊലീസെത്തി വധശ്രമത്തിനു കേസെട‌ുക്കുകയും ഇയാളെ അറസ്റ്റ് ചെയ്യുകയുമായിരുന്നു. കുട്ടികൾ 'മരിച്ചുകിടക്കുന്നതിന്‍റെ' ഫോ​ട്ടോകളെടുത്ത്​ ഭാര്യക്ക്​ അയക്കുകയായിരുന്നു തന്‍റെ ലക്ഷ്യമെന്ന്​ ഇയാൾ പൊലീസിനോട്​ പറഞ്ഞു.