മധുര പലഹാരകടക്ക്​ കറാച്ചിയെന്ന്​ പേര്; മാറ്റണമെന്ന ആവശ്യവുമായി ശിവസേന

മുംബൈ: നഗരത്തിലെ മധുരപലഹാര കടയുടെ പേര്​ മാറ്റണമെന്ന ആവശ്യവുമായി ശി​വസേന. കറാച്ചിയെന്ന പേര്​ മാറ്റണമെന്നാണ്​ ശിവസേനയുടെ ആവശ്യം. ഇക്കാര്യത്തിൽ കൂടുതൽ കുഴപ്പത്തിലേക്ക്​ നീങ്ങാൻ ആഗ്രഹിക്കുന്നില്ലെന്നും അഭിഭാഷകനുമായി കൂടിയാലോചിച്ച്​ പേര്​ മാറ്റുമെന്നും​ ബാന്ദ്രയിലെ കടയുടമ പ്രതികരിച്ചു.

കടയുടെ പേരിൽ നിന്ന്​ കറാച്ചി ഒഴിവാക്കണമെന്ന ശിവസേന നേതാവ്​ ആവശ്യപ്പെടുന്ന വിഡിയോ ദൃശ്യങ്ങളും പുറത്ത്​ വന്നിട്ടുണ്ട്​. ശിവസേന നേതാവ്​ നിതിൻ ന​ന്ദോഗോൻഗറാണ്​ കടയുടെ പേര്​ മാറ്റണമെന്ന ആവശ്യമായി രംഗത്തെത്തിയതെന്ന്​ ഉടമ പറഞ്ഞു. ശിവസേന നേതാവ്​ മാന്യമായാണ്​ സംസാരിച്ചതെന്നും അദ്ദേഹം വ്യക്​തമാക്കി.

കടയുടമയോട്​ സംസാരിക്കുന്നതിൻെറ വിഡിയോ ശിവസേന നേതാവ്​ തന്നെ പുറത്ത്​ വിട്ടിരുന്നു. കറാച്ചിയെന്ന വാക്ക്​ ഞങ്ങൾ വെറുക്കുന്നു. അത്​ പാകിസ്​താനിലെ തീവ്രവാദികളുടെ താവളമാണ്​. അതുകൊണ്ട്​ നിങ്ങൾ പേര്​ മാറ്റണം. ഇന്ത്യൻ ജവാൻമാർ തീവ്രവാദികളോട്​ പോരാടിയാണ്​ വീരമൃത്യു വരിച്ചത്​. അതിനാൽ മഹാരാഷ്​ട്രയിലും മുംബൈയിലും കറാച്ചിയെന്ന പേര്​ അനുവദിക്കാനാവില്ല. നിങ്ങൾക്ക്​ കുടുംബത്തിൻെറ പേരോ മറ്റ്​ ഏതെങ്കിലും പേരോ മധുരപലഹാര കടക്ക്​ നൽകാം. പേര്​ മാറ്റാനായി സമയം അനുവദിക്കുകയാണെന്നും ശിവസേന നതോവ്​ വിഡിയോയിൽ പറഞ്ഞിരുന്നു.