നരോദഗാം: അപ്പീൽ പോകണമെന്ന്​ കോൺഗ്രസ്​; ആപിന്​ മൗനം

ന്യൂഡൽഹി: നരോദഗാമിൽ 11 മുസ്​ലിംകളെ ചുട്ടുകൊന്ന കേസിൽ വിചാരണ കോടതി വിധിക്കെതിരെ ഗുജറാത്ത്​ സർക്കാർ അപ്പീൽ നൽകണമെന്ന്​ കോൺഗ്രസ്​. പ്രോസിക്യൂഷന്‍റെ ഭാഗത്ത്​ സ്പഷ്ടമായ വീഴ്ച പ്രകടമാണെന്ന് പാർട്ടി വക്താവ്​ ജയ്​റാം രമേശ്​ അഭിപ്രായപ്പെട്ടു.

വിധിപ്പകർപ്പ്​ പുറത്തുവരുമ്പോൾ മാത്രമാണ്​ കൂടുതൽ വിശദാംശങ്ങൾ അറിയാനാവുക. എന്നാൽ​ ​പ്രോസിക്യൂഷൻ ഉത്തരവാദിത്തം നിർവഹിച്ചില്ലെന്ന്​ വ്യക്തമാണ്​. അങ്ങനെ ഉണ്ടായിട്ടില്ലെന്ന്​ സർക്കാറിനും പ്രോസിക്യൂഷനും പറയാൻ കഴിയണമെങ്കിൽ ഗൗരവപൂർവം അപ്പീൽ നൽകണം. നിതാന്ത ജാഗ്രതയിലൂടെ നേടി​യെടുക്കേണ്ടതാണ്​ നീതി. കേസിന്‍റെ പുരോഗതി കോൺഗ്രസ്​ പിന്തുടരും. ഹീനമായ കുറ്റകൃത്യത്തിന്‍റെ ഇരകളെ പിന്തുണക്കുന്നു. വൈകിയാലും നീതി നിഷേധിക്കപ്പെടില്ലെന്നാണ്​ പ്രതീക്ഷ -ജയ്​റാം രമേശ്​ പറഞ്ഞു.

കോൺഗ്രസ്​ മുൻ എം.പി ഇസ്​ഹാൻ ജാഫരി കൊല്ലപ്പെട്ട സംഭവത്തിൽ ഉൾപ്പെടെ, ഗുജറാത്ത്​ വംശഹത്യയുമായി ബന്ധ​പ്പെട്ട പ്രതികരണങ്ങളിൽ വലിയ സൂക്ഷ്മത കോൺഗ്രസ്​ കാണിച്ചു വരുന്നതാണ്​ രീതി. സംസ്ഥാനത്തെ രാഷ്ട്രീയ സാഹചര്യങ്ങൾക്കിടയിലാണ്​ ഈ മിതത്വം. കോൺഗ്രസിന്‍റെ പ്രസ്താവനകൾ ബി.ജെ.പി ആയുധമാക്കുകയും ചെയ്യുന്നു.

കോൺഗ്രസിനെ തള്ളിമാറ്റുന്ന വിധം ഗുജറാത്ത്​ നിയമസഭ തെരഞ്ഞെടുപ്പിൽ സജീവമായിരുന്ന ആം ആദ്​മി പാർട്ടിയാകട്ടെ, നരോദഗാം കേസിലെ വിധിയെക്കുറിച്ച്​ മൗനംപാലിച്ചു. പാർട്ടിയുടെ മൃദുഹിന്ദുത്വ സമീപനങ്ങൾക്കിടെയാണിത്​.

നിയമവാഴ്ച ആഘോഷിക്കുകയാണോ, നിയമവാഴ്ചക്ക്​ ചരമഗീതം പാടുകയാണോ വേണ്ടതെന്ന ചോദ്യമാണ്​ കോൺഗ്രസ്​ വിട്ട കപിൽ സിബൽ നരോദഗാം വിധിക്ക്​ പിന്നാലെ ഉയർത്തിയത്​. ആരാണ്​ കൊന്നതെന്ന്​ അന്വേഷകർ കണ്ടെത്തിയതാണ്​. എന്നാൽ പ്രതികളെ ശിക്ഷിക്കാനാണോ, വിട്ടയക്കാനാണോ പ്രോസിക്യൂഷൻ കോടതിയിൽ ആവശ്യപ്പെട്ടത്​? അദ്ദേഹം ചോദിച്ചു.