സിദ്ദു ഹൈക്കമാൻഡിന്​ വഴങ്ങുന്നു; രാജി പിൻവലിച്ചേക്കും

ഛണ്ഡിഗഢ്​: നവ്​ജ്യോത്​ സിങ്​ സിദ്ദു പഞ്ചാബ്​ പി.സി.സി അധ്യക്ഷസ്ഥാനത്ത്​ നിന്നുള്ള രാജി പിൻവലിക്കുമെന്ന്​ സൂചന. സിദ്ദുവിന്‍റെ ഉപദേശകനായ മുഹമ്മദ്​ മുസ്​തഫയാണ്​ ഇക്കാര്യം അറിയിച്ചത്​. സിദ്ദു കോൺഗ്രസ്​ നേതൃത്വത്തിന്​ മുകളിലല്ല. പാർട്ടി​ നേതൃത്വത്തെ പരിഗണിക്കാത്ത അമരീന്ദർ സിങ്ങല്ല സിദ്ദുവെന്നും മുസ്​തഫ പറഞ്ഞു.

അതേസമയം, നവ്​ജ്യോത്​ സിങ്​ സിദ്ദു പഞ്ചാബ്​ മുഖ്യമന്ത്രി ചരൺജിത്​ സിങ്​ ഛന്നിയുമായി ഇന്ന്​ കൂടിക്കാഴ്ച നടത്തും. ഛണ്ഡിഗഢിൽ മൂന്ന്​ മണിക്കാണ്​ കൂടിക്കാഴ്ച. സിദ്ദു ട്വിറ്ററിലൂടെയാണ്​ ഇക്കാര്യം അറിയിച്ചത്​. കഴിഞ്ഞ ജൂലൈയിലാണ്​ സിദ്ദു പാർട്ടി അധ്യക്ഷനായി തെരഞ്ഞെടുക്കപ്പെട്ടത്​. ചൊവ്വാഴ്ച പദവി രാജിവെക്കുകയും ചെയ്​തു.

ചരൺജിത്​ സിങ്​ സർക്കാറിന്‍റെ ചില നിയമനങ്ങളിൽ സിദ്ദുവിന്​ അതൃപപ്​തിയുണ്ടെന്ന റിപ്പോർട്ടുകൾ പുറത്ത്​ വന്നിരുന്നു. ഇതാണ്​ രാജിയിലേക്ക്​ നയിച്ചതെന്നായിരുന്നു വാർത്തകൾ. സിദ്ദുവിന്‍റെ രാജി കോൺഗ്രസ്​ ദേശീയ നേതൃത്വത്തിനും ഞെട്ടലുണ്ടാക്കിയിരുന്നു. അമരീന്ദർ സിങ്​-സിദ്ദു പോരിൽ സിധുവിനൊപ്പമാണ്​ കോൺഗ്രസ്​ ദേശീയ നേതൃത്വം നിലകൊണ്ടത്​.