അയോധ്യയിലെ പുതിയ മസ്​ജിദ്: റിപബ്ലിക്​ ദിനത്തിൽ ദേശീയ പതാക ഉയർത്തി നിർമാണം തുടങ്ങും

അയോധ്യ: സുപ്രീം കോടതി വിധിയുടെ അടിസ്ഥാനത്തിൽ അയോധ്യയിൽ നിർമിക്കുന്ന മസ്ജിദിന്‍റെ നിർമാണം റിപബ്ലിക്​ ദിനത്തിൽ വൃക്ഷത്തെകൾ നട്ടും ദേശീയ പാതാക ഉയർത്തിയും ആരംഭിക്കും. രാമക്ഷേത്രം നിർമിക്കുന്ന സ്ഥലത്തുനിന്ന് 25 കിലോമീറ്റർ അകലെ അഞ്ച് ഏക്കർ സ്ഥലത്താണ്​ ഇന്തോ-ഇസ്ലാമിക് കൾച്ചറൽ ഫണ്ടേഷൻ ട്രസ്റ്റിന്‍റെ കീഴിൽ നിർമാണം ആരംഭിക്കുന്നത്​. ജനുവരി 26ന് രാവിലെ 8.30നാണ്​ ചടങ്ങ്​ ആരംഭിക്കുക.

ഇതിന്‍റെ ഭാഗമായി ഫൗണ്ടേഷനിലെ ഒമ്പത് ട്രസ്റ്റിമാർ ഞായറാഴ്ച യോഗം ചേർന്നു. വിദേശ സംഭാവന സ്വീകരിക്കുന്നതിൽ ആദായനികുതി വകുപ്പിന്‍റെ ക്ലിയറൻസ്​ ലഭിക്കുന്നതിലെ കാലതാമസം ഒഴിവാക്കൽ, 26ലെ കാര്യപരിപാടികൾ എന്നിവ യോഗം ചർച്ചചെയ്​തു.

പ്രദേശത്തെ നാട്ടുകാരെ സേവിക്കാനും കാലാവസ്ഥാ വ്യതിയാനത്തെക്കുറിച്ച് അവബോധം സൃഷ്ടിക്കാനുമാണ്​ വൃക്ഷത്തൈകൾ നട്ടുപിടിപ്പിക്കുന്നത്​. ആമസോൺ മഴക്കാടുകൾ, ആസ്‌ട്രേലിയ എന്നിവക്ക്​ പുറമെ മറ്റു വിദേശ നാടുകളിൽനിന്നുള്ള മരങ്ങൾ ഇവിടെ വളരും. ഇതോടൊപ്പം ഇന്ത്യയിലെ വിവിധ പ്രദേശങ്ങളിൽനിന്നുള്ള ചെടികളും നട്ടുപിടിപ്പിക്കും.

പള്ളിയോടനുബന്ധിച്ച്​​ നിർമിക്കുന്ന ആശുപത്രി, മ്യൂസിയം, ലൈബ്രറി, കമ്മ്യൂണിറ്റി കിച്ചൺ, ഇന്തോ-ഇസ്ലാമിക് കൾച്ചറൽ റിസർച്ച് സെന്‍റർ, പബ്ലിക്കേഷൻ ഹൗസ് എന്നിവയുടെ പ്ലാൻ അംഗീകരിക്കാൻ അ​പേക്ഷ നൽകാനും യോഗം തീരുമാനിച്ചു. ഇതിന്‍റെ ഭാഗമായുള്ള മണ്ണ്​ പണിശോധന ആരംഭിച്ചിട്ടുണ്ട്​.

പള്ളിയോടനുബന്ധിച്ച്​ 300 കിടക്കകളുള്ള മൾട്ടി സ്​പെ​ഷാലിറ്റി ആശുപത്രി, ദിവസം രണ്ടുനേരം സൗജന്യ ഭക്ഷണം വിളമ്പുന്ന സമൂഹ അടുക്കള, ഹിന്ദു-മുസ്​ലിം സംസ്​കൃതി വിവരിക്കുന്ന മ്യൂസിയം, ഇന്ത്യയിലെ ഇസ്​ലാമിക സംസ്​കാരവും സാഹിത്യവും സംബന്ധിച്ച പഠനത്തിന്​ ഗവേഷണ സൗകര്യമുള്ള ലൈബ്രറി, പുസ്​തക പ്രസാധനശാല എന്നിവയെല്ലാമാണ്​ ഇവിടെ ഉയരുക.

ധന്നിപ്പുർ ഗ്രാമത്തിൽ സർക്കാർ അനുവദിച്ച അഞ്ച്​ ഏക്കർ ഭൂമിയിലാണ്​ നിർമാണം. പരമ്പരാഗത ശൈലിയിൽനിന്ന്​ ഭിന്നമായി ആധുനിക രീതിയിലാണ്​ മസ്​ജിദ്​ രൂപകൽപന ചെയ്​തിരിക്കുന്നത്​. വൃത്താകൃതിയിലുള്ള മസ്​ജിദിൽ രണ്ട്​ നിലയിലായി 2000 പേർക്ക്​ നമസ്​കരിക്കാൻ സൗകര്യമുണ്ടാകും.

1700 ചതുരശ്ര മീറ്റർ ചുറ്റളവിലാണ്​ മസ്​ജിദ്​ നിർമിക്കുന്നത്​. കാലോചിത രീതിയിലുള്ള രണ്ട്​ മിനാരങ്ങളും ഗ്ലാസ്​ താഴികക്കുടവുമുണ്ട്​. പൂർണമായും സൗരോർജം ഉപയോഗിക്കുന്നതിനാൽ 'സീറോ എനർജി' ആയിരിക്കും മസ്​ജിദിന്‍റെ മറ്റൊരു സവിശേഷത.

ആദ്യഘട്ടത്തിൽ മസ്​ജിദ്​ മാത്രമാണ്​ നിർമിക്കുന്നത്​. ആശുപത്രിയും മറ്റും രണ്ടാംഘട്ടത്തിലാണ്​. പോഷകാഹാരക്കുറവുമൂലം രോഗങ്ങളുള്ള കുട്ടികൾക്കും ഗർഭിണികൾക്കുമുൾപ്പെടെ സമീപ്രദേശങ്ങളിലുള്ളവർക്ക് പ്രയോജനപ്പെടുന്ന രീതിയിലാണ്​ ആശുപത്രി വിഭാവനം ചെയ്​തിരിക്കുന്നത്​. ഭാവിയിൽ ആശുപത്രിയോട്​ ചേർന്ന് നഴ്​സിങ്​-പാരാമെഡിക്കൽ കോളജും നിർമിക്കാൻ ആലോചനയുണ്ട്​.