കർഷക സമരത്തെ പിന്തുണച്ച ​പോപ്​ താരം റിഹാനയുടെ കമ്പനിക്കെതിരെ പരാതി

മുംബൈ: കേന്ദ്ര സർക്കാറിന്‍റെ കാർഷിക നിയമങ്ങൾക്കെതിരെ പ്രക്ഷോഭം തുടരുന്ന കർഷകർക്ക്​ ഐക്യദാർഢ്യം പ്രഖ്യാപിച്ച പോപ്​ താരം റിഹാനയുടെ കമ്പനിക്കെതിരെ പരാതി. റിഹാനയുടെ സൗന്ദര്യ വർധക വസ്​തു നിർമാണ കമ്പനിയായ ഫെന്‍റി ബ്യൂട്ടിക്കെതിരെ ബാലവേലയുമായി ബന്ധപ്പെടുത്തിയാണ്​ പരാതി.

സൗന്ദര്യ വർധക വസ്​തു നിർമാണത്തിന്​ ഉപയോഗിക്കുന്ന '​െമെക്ക' വാങ്ങുന്ന ജാർഖണ്ഡിലെ ഖനികളിൽ ബാലവേല നടക്കുന്നുണ്ടെന്ന്​ ചൂണ്ടിക്കാട്ടി ഒരു എൻ.ജി.ഒ ദേശീയ ബാലാവകാശ കമീഷനെ സമീപിക്കുകയായിരുന്നു.

കമ്പനി ഉപയോഗിക്കുന്ന 'മൈക്ക' നിർമിക്കുന്ന ഖനികൾ ബാലവേല രഹിതമാണെന്ന്​ ഔദ്യോഗിക ഏജൻസികളിൽ നിന്ന്​ സർട്ടിഫിക്കറ്റ്​ ​ഇല്ലെന്നും ലീഗൽ റൈറ്റ്​സ്​ ഒബ്​സർവേറ്ററി പ്രവർത്തകനായ വിനയ്​ ​േജാഷി പറയുന്നു.

കർഷകരെ പിന്തുണച്ച്​ റിഹാന രംഗത്തെത്തിയതിന്​ പിന്നാലെയാണ്​ പരാതി. റിഹാനയുടെ ട്വീറ്റിന് പിന്നാലെ​​ കാലാവസ്​ഥ പ്രവർത്തക ഗ്രെറ്റ തുൻബർഗ്​, യു.എസ്​ വൈസ്​ പ്രസിഡന്‍റ്​ കമല ഹാരിസിന്‍റെ ബന്ധു മീന ഹാരിസ്​ ഉൾപ്പെടെ നിരവധി പേർ കർഷക സമരത്തെ പിന്തുണച്ച്​ രംഗത്തെത്തിയിരുന്നു. റിഹാനയുടെ ട്വീറ്റിലൂടെ ലോകം മുഴുവൻ കർഷക സമരത്തെക്കുറിച്ച്​ ചർച്ച ചെയ്യുകയും ചെയ്​തിരുന്നു.

എന്നാൽ, റിഹാനയുടെ ട്വീറ്റിനെതിരെ ഇന്ത്യയിലെ ​സചിൻ ടെണ്ടുൽക്കർ ഉൾപ്പെടെ സെലിബ്രിറ്റികൾ രംഗത്തെത്തിയിരുന്നു. സമരത്തിന്​ കൂടുതൽ പിന്തുണ ലഭിച്ചതോടെ കേന്ദ്രവും അവരെ പിന്തുണക്കുന്നവരും അസ്വസ്​ഥത പ്രകടിപ്പിച്ചിരുന്നു.