ബി.ജെ.പി നേതാക്കളുമായി കൂടിക്കാഴ്ച; ബാബ അമൻ സിങ്ങിനെ ബഹിഷ്​കരിച്ച്​ നിഹാംഗ്​ വിഭാഗം

ജലന്ദർ: കേന്ദ്ര കൃഷിമ​ന്ത്രി നരേന്ദ്ര സിങ്​ തോമറുമായുള്ള ചിത്രങ്ങൾ പുറത്തുവന്നതിന്​ പിന്നാലെ ബാബ അമൻ സിങ്ങിനെ ബഹിഷ്​കരിച്ച്​ നിഹാംഗ്​ വിഭാഗം. ബി.ജെ.പി നേതാക്കളുമായി നടത്തിയ കൂടിക്കാഴ്ച സംബന്ധിച്ച്​ അന്വേഷണം വേണമെന്നും അവർ ആവശ്യപ്പെട്ടു.

നിഹാംഗ്​ വിഭാഗങ്ങളിലൊന്നിന്‍റെ തലവനാണ്​ ബാബ അമൻ സിങ്​. ബാബ അമൻ സിങ്ങും തോമറും ഒന്നിച്ചുള്ള ചിത്രം സമൂഹമാധ്യമങ്ങളിൽ വൈറലായിരുന്നു. ഇരുവർക്കുമൊപ്പം ബി.ജെ.പി നേതാവ്​ സുഖ്​മീന്ദർപാൽ സിങ്​ ഗരേവലും മുൻ പഞ്ചാബ്​ പൊലീസ്​ ഉദ്യോഗസ്​ഥനായ ഗുർമീത്​ സിങ്​ പിങ്കിയുമു​ണ്ടായിരുന്നു. കൊലപാതക കേസിൽ ശിക്ഷിക്കപ്പെട്ടതിന്​ പിന്നാലെ പൊലീസ്​ സേനയിൽനിന്ന്​ പുറത്തുപോയയാളാണ്​ ഗുർമീത്​ സിങ്​.

സിംഘു അതിർത്തിയി​ൽ ദലിത്​ യുവാവിന്‍റെ ദാരുണ കൊലപാതകത്തിന്​ പിന്നാലെയാണ്​ പഴയ ചിത്രം സമൂഹമാധ്യമങ്ങളിൽ വൈറലായത്​.

'ഇന്നുമുതൽ അമൻ സിങ്ങുമായി യാതൊരു ബന്ധവുമി​െല്ലന്ന്​ പറയാൻ ഞാൻ ആഗ്രഹിക്കുന്നു. അദ്ദേഹം എന്തു ചെയ്​താലും (ബി​.ജെ.പി നേതാക്കളുമായി കൂടിക്കാഴ്ച) അത്​ പൊലീസ്​ ചോദ്യം ചെയ്യണം. ബി.ജെ.പി നേതാക്കളുമായി എന്തിന്​ കൂടിക്കാഴ്ച നടത്തിയെന്ന്​ പൊലീസ്​ അദ്ദേഹത്തോട്​ വടികൊണ്ട്​ അടിച്ചു ചോദിക്കണം. അദ്ദേഹം ഒരിക്കലും നിഹാംഗ്​ ബാബ മൻ സിങ്ങിനോട്​ വെളിപ്പെടുത്തിയിട്ടില്ല. കൂടിക്കാഴ്ച സംബന്ധിച്ച്​ ആരോടും പറഞ്ഞിട്ടില്ല. എന്നിരുന്നാലും, ഞങ്ങൾ ലഖ്​ബീർ സിങ്ങിനെ കൊലപ്പെടുത്തിയ നിഹാംഗിനെ പിന്തുണക്കും. അവർക്ക്​ നിയമസഹായം നൽകും' -സിംഘു അതിർത്തിയിൽ തമ്പടിച്ചിരിക്കുന്ന നിഹാംഗ്​ ഗ്രൂപ്പിന്‍റെ തലവൻമാരിലൊരാളായ രാജാ രാജ്​ സിങ്​ പറഞ്ഞു.

അമൻ സിങ്​ പറയുന്നതെല്ലാം കളവാണെന്നും അദ്ദേഹം പറഞ്ഞു. സംഭവത്തിൽ അന്വേഷണം നടക്കണം. ഈ കേസിൽ ഞങ്ങൾ പൊലീസിനൊപ്പമാണ്​. ഞങ്ങൾ (ആറ്​ നിഹാംഗ്​ സംഘങ്ങൾ) ഏതെങ്കിലും ഒരു മന്ത്രിയുമായി കൂടിക്കാഴ്ച നടത്തിയെന്ന്​ തെളിയിക്കാൻ വെല്ലുവിളിക്കുന്നു. ഞങ്ങളെല്ലാവരും തുറന്ന മനസുള്ള ആളുകളാണ്​. ബി.ജെ.പി നേതാക്കളുമായി ഗൂഡാലോചന നടത്തിയെന്നോ, സിംഘു അതിർത്തിയിലെ കൊലപാതകത്തിൽ ഉൾപ്പെ​ട്ടെന്നോ കണ്ടെത്തിയാൽ ഞങ്ങളെ അവർക്ക്​ വെട്ടിനുറുക്കി നായ്​ക്ക്​ ഇട്ടുനൽകാം -രാജാ രാജാ സിങ്​ പറഞ്ഞു.