കോവിഡ്​ ബാധിച്ച്​ മരിച്ച സ്​ത്രീയുടെ മൃതദേഹം ബൈക്കിൽ ശ്​മശാനത്തിലെത്തിച്ച്​ ബന്ധുക്കൾ; പ്രതിഷേധം

ശ്രീകാകുളം: രാജ്യത്ത്​ കോവിഡ്​ ബാധിതരുടെ എണ്ണവും മരണനിരക്കും കുതിച്ചുയരുകയാണ്​. ആശുപത്രി സൗകര്യങ്ങളുടെ അപര്യാപ്​തതയും ഒാക്​സിജൻ അഭാവവുമെല്ലാം ഇതിന്​ ആക്കം കൂട്ടുകയായിരുന്നു. വിവിധ സംസ്​ഥാനങ്ങളിൽനിന്ന്​ ഞെട്ടിക്കുന്ന ദൃ​ശ്യങ്ങളും വാർത്തകളുമാണ്​ ഒരാഴ്ചയായി പുറത്തുവരുന്നത്​. ഇത്തരത്തിൽ ആന്ധ്രാപ്രദേശിൽനിന്നുള്ള കരളലിയിപ്പിക്കുന്ന ദൃശ്യം​ സമൂഹമാധ്യമങ്ങളിൽ​ വൈറലാകുകയാണ്​​.

കോവിഡ്​ ബാധിച്ച്​ മരിച്ച സ്​ത്രീയുടെ മൃതദേഹം ബൈക്കിൽ ഇരുത്തി ശ്​മശാനത്തിലേക്ക്​ കൊണ്ടുപോകുന്നതാണ്​ ദൃശ്യം. ആന്ധ്രപ്രദേശിലെ ശ്രീകാകുളത്താണ്​ സംഭവം.

കോവിഡ്​ രോഗ ലക്ഷണങ്ങൾ ശ്രദ്ധയിൽപ്പെട്ടതിനെ തുടർന്ന്​ 50കാരി സ്രവ പരിശോധനക്ക്​ നൽകിയിരുന്നു. രോഗം മൂർച്ഛിച്ചതോടെ മന്ദാസ മണ്ഡൽ ഗ്രാമവാസിയായ സ്​ത്രീയെ ബന്ധുക്കൾ ആശുപത്രിയിലേക്ക്​ ​കൊണ്ടുപോകുകയും ചെയ്​തു. ആശുപത്രിയിലെത്തിച്ചെങ്കിലും പരിശോധന ഫലം പുറത്തുവരുന്നതിന്​ മുമ്പ്​ സ്​ത്രീ മരിച്ചു.

ഏറെനേരം കാത്തിരുന്നെങ്കിലും ആശുപത്രിയിൽനിന്ന്​ മൃതദേഹം ശ്​മശാനത്തിലെത്തിക്കാൻ കുടുംബത്തിന്​ ആംബുലൻസോ മറ്റു വാഹന​ങ്ങളോ ലഭിച്ചില്ല. തുടർന്നാണ്​ സ്​ത്രീയുടെ മൃതദേഹം ബൈക്കിൽ ശ്​മശാനത്തിലേക്ക്​ കൊണ്ടുപോകാൻ ബന്ധുക്കൾ തീരുമാനിച്ചത്​. മകനും മരുമകനും ചേർന്നാണ്​ മൃതദേഹം ശ്​മശാനത്തിലെത്തിച്ചത്​. സംഭവത്ത​ിന്‍റെ ചിത്രങ്ങളും വിഡ​ിയോകളും വൻതോതിൽ സമൂഹമാധ്യമങ്ങളിൽ പ്രചരിച്ചു. കടുത്ത പ്രതിഷേധമാണ് ​സർക്കാറിനെതിരെ ഇപ്പോൾ ഉയരുന്നത്​.

കോവിഡ്​ 19ന്‍റെ ഒന്നാം വ്യാപനത്തിൽ ആന്ധ്രപ്രദേശ്​ സർക്കാർ 1088 ആംബുലൻസുകളും 104 മെഡിക്കൽ യൂനിറ്റുകളും പുറത്തിറക്കിയിരുന്നു. എന്നാൽ ഈ സൗകര്യങ്ങളൊന്നും ഇ​േപ്പാൾ ലഭ്യമല്ലെന്നാണ്​ ഉയരുന്ന പരാതി.