ലോക്​ഡൗണിനിടെ മരിച്ച അന്തർസംസ്ഥാന തൊഴിലാളികളുടെ കണക്ക്​ രേഖപ്പെടുത്തിയിട്ടില്ല - കേന്ദ്രസർക്കാർ

ന്യൂഡൽഹി: ലോക്​ഡൗണിനിടെ മരണപ്പെട്ട അന്തർ സംസ്ഥാന തൊഴിലാളികളുടെ എണ്ണം സംബന്ധിച്ച ഔദ്യോഗിക കണക്ക്​ രേഖപ്പെടുത്തിയിട്ടില്ലെന്ന്​​ കേന്ദ്രസർക്കാർ. മൺസൂൺ സമ്മേളനത്തിനായി ചേർന്ന ലോക്​സഭയിൽ കേന്ദ്ര തൊഴിൽ മന്ത്രിയാണ്​​ ഇക്കാര്യം അറിയിച്ചത്​.

അപ്രതീക്ഷിതമായി ലോക്​ഡൗൺ പ്രഖ്യാപിച്ചതിനിടെ തുടർന്ന്​ വിവിധ സംസ്ഥാനങ്ങളിലെ തൊഴിലിടങ്ങളിൽ നിന്നായി ആയിരക്കണക്കിന്​ തൊഴിലാളികളാണ്​ കാൽനടയായും മറ്റും സ്വദേശങ്ങളിലേക്ക്​ തിരിച്ചത്​. അനാരോഗ്യം മൂലവും അപകടങ്ങളിൽപെട്ടും നിരവധി പേർ മരിക്കുകയും ചെയ്​തിരുന്നു. ഇത്തരത്തിൽ മരിച്ച തൊഴിലാളികളുടെ കുടുംബത്തിന്​ ധനസഹായമോ നഷ്​ടപരിഹാരമോ സർക്കാർ നൽകുമോ എന്നായിരുന്നു ചോദ്യം. എന്നാൽ മരിച്ച തൊഴിലാളികളുടെ ആകെ എണ്ണമോ സംസ്ഥാനം തിരിച്ച്​ മരണം​ രേഖപ്പെടുത്തുകയോ ചെയ്​തിട്ടില്ലെന്ന്​ തൊഴിൽ മന്ത്രാലയത്തി​െൻറ ചുമതലയുള്ള സഹമ​ന്ത്രി സന്തോഷ്​ കുമാർ ഗാങ്​വാർ അറിയിച്ചു.

1.04 കോടിയിലധികം ഇതരസംസ്ഥാന തൊഴിലാളികളാണ്​ ലോക്​ഡൗണിനെ തുടർന്ന്​ സ്വദേശങ്ങളിലേക്ക്​ മടങ്ങിയത്​. ഉത്തർപ്രദേശിൽ മാത്രം 34.4 ലക്ഷം പേർ തിരിച്ചെത്തി. ബിഹാറിൽ 15 ലക്ഷം പേരും രാജസ്ഥാനിൽ 13 ലക്ഷം പേരും തിരിച്ചെത്തി. ഇതരസംസ്ഥാന തൊഴിലാളികളുടെ മടക്കത്തിനായി ഇന്ത്യൻ റെയിൽവേ 4,611 ശ്രമിക്​ പ്രത്യേക തീവണ്ടി സർവീസുകൾ നടത്തി. 63.07 ലക്ഷം തൊഴിലാളികളെ യു.പി, ബിഹാർ, ​ഝാർഖണ്ഡ്​, മധ്യപ്രദേശ്​ എന്നീ സംസ്ഥാനങ്ങളിലെ വിവിധ സ്ഥലങ്ങളിലെത്തിച്ചു. തൊഴിലാളികളുടെ യാത്രക്കായും അല്ലാത്തവരെ പാർപ്പിക്കുന്നതിനും ആവശ്യമായ സൗകര്യങ്ങൾ ഏർപ്പെടുത്താൻ സംസ്ഥാനങ്ങൾക്കും കേന്ദ്രഭരണപ്രദേശങ്ങൾക്കും നിർദേശം നൽകിയിരുന്നതായും മന്ത്രി ലോക്​സഭയിൽ അറിയിച്ചു.

മാധ്യമങ്ങൾ പുറത്തുവിട്ട കണക്ക്​ പ്രകാരം റെയിൽ വേ ശ്രമിക്​ ​പ്രത്യേക ട്രെയിനുകൾ ഏർപ്പെടുത്തുന്നതു വരെ 80 ഒാളം തൊഴിലാളികൾ മരിച്ചിട്ടുണ്ട്​​.

കേന്ദ്രസർക്കാർ ഏർപ്പെടുത്തിയിട്ടുള്ള ക്ഷേമ പദ്ധതികൾ എല്ലാവരിലേക്കും എത്തിക്കുന്നതിന്​ ഇതര സംസ്ഥാനതൊഴിലാളികളുടെ വിവരങ്ങൾ ശേഖരിക്കാൻ സംസ്ഥാനങ്ങളോടും കേന്ദ്രഭരണപ്രദേശങ്ങളോടും ആവശ്യപ്പെട്ടിരുന്നതായും തൊഴിൽ വകുപ്പ്​ മന്ത്രി അറിയിച്ചു. തമിഴ്​നാട്ടിലെ തൊഴിലാളികൾ നേരിട്ട പ്ര​ശ്​നങ്ങളെ കുറിച്ച്​ ഉയർന്ന ചോദ്യത്തിന്​, ഇന്ത്യ ഒരു രാജ്യമെന്ന നിലയിൽ കേന്ദ്ര-സംസ്ഥാന സർക്കാറുകളും പ്രാദേശിക ഭരണകൂടങ്ങളും സ്വയം സഹായ സംഘങ്ങളും റെസിഡൻഷ്യൽ അസോസിയേഷനുകളും സർക്കാർ ഇതര സംഘടനകളും ആരോഗ്യ പ്രവർത്തകരും ശുചീകരണ തൊഴിലാളികളും തുടങ്ങി, രാഷ്​ട്രം അപ്രതീക്ഷമായെത്തിയ കോവിഡ്​ മഹാമാരിക്കെതിരെ പോരാടുകയാണുണ്ടായത്​. അതിൽ തമിഴ്​നാടും ഉൾപ്പെടും എന്നായിരുന്നു മന്ത്രിയുടെ മറുപടി.