തമിഴ്​നാട്ടിൽ ഹിന്ദി അടിച്ചേൽപ്പിക്കുന്നത്​ തേനീച്ചക്കൂട്ടിൽ കല്ലെറിയുന്നതിന്​ തുല്യം -സ്​റ്റാലിൻ

ചെന്നൈ: മാനവ വിഭവശേഷി മന്ത്രാലയം രൂപം നൽകിയ പുതിയ വിദ്യാഭ്യാസ നയത്തിൽ ഹിന്ദി സംസാരിക്കാത്ത സംസ്ഥാനങ്ങളിൽ ഹിന്ദി നിർബന്ധ വിഷയമാക്കിയ നടപടി​ക്കെതിരെ ഡി.എം.കെ അധ്യക്ഷൻ എം.കെ സ്​റ്റാലിൻ രംഗത്ത്​. തമിഴരുടെ രക്തത്തിൽ ഹിന്ദിക്ക്​ സ്ഥാനമില്ലെന്നും തമിഴ്​നാട്ടിൽ ഹിന്ദി അടിച്ചേൽപിക്കുന്നത്​ തേനീച്ചക്കൂടിന്​ കല്ലെറിയുന്നതിന്​ തുല്യമാണെന്നും അദ്ദേഹം പറഞ്ഞു. ഈ വിഷയം ഡി.എം.കെ എം.പിമാർ പാർലമ​​െൻറിൽ ഉന്നയിക്കുമെന്നും സ്​റ്റാലിൻ കൂട്ടിച്ചേർത്തു.

ദക്ഷിണേന്ത്യയിൽ ഹിന്ദി നിർബന്ധ വിഷയമാക്കിയാൽ കേന്ദ്രം ഭരിക്കുന്ന ബി.ജെ.പി സർക്കാറിനെതിരെ ഡി.എം.കെയുടെ നേതൃത്വത്തിൽ പ്രക്ഷോപം സംഘടിപ്പിക്കുമെന്ന്​ സ്​റ്റാലിൻ പറഞ്ഞു. മൂന്ന്​ ഭാഷകളടങ്ങിയ രീതി ഞെട്ടിപ്പിക്കുന്നതാണ്​. ഈ നിർദേശം​ രാജ്യത്തെ വിഭജിക്കും. ഇത്​ തമിഴ്​നാട്ടിലെ ഡി.എം.കെ ഉൾപ്പെടെയുള്ള രാഷ്​ട്രീയ പാർട്ടികൾ എതിർത്തിരുന്നുവെന്നും സ്​റ്റാലിൻ പറഞ്ഞു.

അതേസമയം, ഒരു ഭാഷയും ആരിലും അടിച്ചേൽപ്പിക്കാൻ ഉദ്ദേശിക്കുന്നി​ല്ലെന്നും എല്ലാം ഇന്ത്യൻ ഭാഷകളേയും പ്രോത്സാഹിപ്പിക്കേണ്ടതുണ്ടെന്നും മാനവ വിഭവ ശേഷി വകുപ്പ്​ മന്ത്രി പ്രകാശ്​ ജാവ്​ദേക്കർ പറഞ്ഞു. കമ്മിറ്റി തയാറാക്കിയ കരട്​ മാത്രമാണിത്​. പൊതുജനങ്ങളുടെ അഭിപ്രായമറിഞ്ഞ ശേഷമേ റിപ്പോർട്ട്​ നടപ്പാക്കുന്ന കാര്യത്തിൽ സർക്കാർ തീരുമാനമെടുക്കൂവെന്നും അദ്ദേഹം പറഞ്ഞു.

കെ. കസ്​തൂരിരംഗൻ കമ്മിറ്റി മെയ്​ 31ന്​ ദേശീയ വിദ്യാഭ്യാസ നയത്തിൻെറ കരട്​ സമർപ്പിച്ച്​ മണിക്കൂറുകൾക്ക്​ ശേഷമാണ്​ സ്​റ്റാലിൻ പ്രതികരണവുമായി രംഗത്തെത്തിയത്​. സംസ്​ഥാനത്ത്​ പ്രാദേശിക ഭാഷ, ഹിന്ദി, ഇംഗ്ലീഷ്​ എന്നിങ്ങനെ മൂന്ന്​ ഭാഷകളടങ്ങിയ സമവാക്യമാണ്​ കമീഷൻെറ 500 പേജടങ്ങിയ റിപ്പോർട്ടിലുള്ളത്​.

ഹിന്ദി സംസാരിക്കാത്ത മുഴുവൻ സംസ്ഥാനങ്ങളിലും നഴ്​സറി വിഭാഗം മുതൽ 12ാം തരം വരെയുള്ള ക്ലാസുകളിൽ ഹിന്ദി പഠന വിഷയമാക്കണമെന്നും ഹിന്ദി സംസാരിക്കുന്ന സംസ്ഥാനങ്ങളിൽ ഹിന്ദിയോടൊപ്പം ഇംഗ്ലീഷും മറ്റേതെങ്കിലും ആധുനിക ഇന്ത്യൻ ഭാഷയും ഉൾ​െപ്പടുത്തണമെന്നുമാണ്​ റിപ്പോർട്ടിൽ നിർദേശിക്കുന്നത്​.