പാർട്ടിക്ക്​ സിഖ്​ മുഖമില്ല; പഞ്ചാബ്​ തെരഞ്ഞെടുപ്പ്​ നേരിടാൻ നേതാക്കളെ തിരഞ്ഞ്​ ബി.ജെ.പി

ന്യൂഡൽഹി: 2022ലെ പഞ്ചാബ്​ നിയമസഭ തെരഞ്ഞെടുപ്പിനെ നേരിടാൻ പ്രമുഖ സിഖ്​ നേതാക്കളെ തിരഞ്ഞ്​ ബി.ജെ.പി. സിഖ്​ ഭൂരിപക്ഷ പ്രദേശമായ പഞ്ചാബിൽ പാർട്ടിക്ക്​ നേതാക്കൾ കുറവായത്​ തിരിച്ചടിയാകുമെന്നാണ്​ വിലയിരുത്തൽ.

25 വർഷത്തിനുശേഷം ആദ്യമായാണ്​ പഞ്ചാബ്​ പിടിക്കാൻ ബി.ജെ.പിയുടെ ഒറ്റക്കുള്ള നീക്കം. സഖ്യകക്ഷിയായിരുന്ന ശിരോമണി അകാലിദൾ എൻ.ഡി.എ വിട്ടതോടെയാണ്​ പ്രതിസന്ധി.

കേന്ദ്രസർക്കാറി​െൻറ മൂന്ന്​ കാർഷിക നിയമങ്ങൾ ബി.ജെ.പിക്ക്​ ഏറ്റവും തലവേദന സൃഷ്​ടിക്കുന്ന സംസ്​ഥാനമാകും പഞ്ചാബ്​. കൂടാതെ കാർഷിക നിയമങ്ങളിൽ പ്രതിഷേധിച്ച്​ ശിരോമണി അകാലിദൾ എൻ.ഡി.എ വിട്ടതും ബി.ജെ.പിക്ക്​ തിരിച്ചടിയാകും. ശിരോമണി അകാലിദളും ബി.ജെ.പിയും തമ്മിലുള്ള 23 വർഷത്തെ കൂട്ടുക്കെട്ടിനാണ്​ സെപ്​തംബറിൽ അവസാനമായത്​. 1997 മുതൽ ഒരുമിച്ചായിരുന്നു ഇരുവരുടെയും മത്സരം.

പഞ്ചാബിലെ 117 സീറ്റിലും ബി.ജെ.പി മത്സര രംഗത്തിറങ്ങുമെന്നാണ്​ വിവരം. എന്നാൽ, മണ്ഡലാടിസ്​ഥാനത്തിൽ സിഖ്​ നേതാക്കളെ അണിനിരത്താൻ ബി.ജെ.പിക്ക്​ കഴിയാറില്ല.

കോൺഗ്രസി​​െൻറ മുഖ്യമന്ത്രി കൂടിയായ അമരീന്ദർ സിങ്ങിനോടും ശിരോമണി അകാലിദള​ിൻറ പ്രകാശ്​ സിങ്​ ബാദലിനോടും ഏറ്റുമുട്ടാനൊരു സിഖ്​ നേതാവിനെ ബി.ജെ.പിക്ക്​ ഇതുവരെ പഞ്ചാബിൽ കണ്ടെത്താൻ സാധിച്ചിട്ടില്ല. ഇത്​ തിരിച്ചടിയാകുമെന്നാണ്​ കേന്ദ്രനേതൃത്വത്തി​െൻറ കണക്കുകൂട്ടൽ.

പ്രതിസന്ധി നേരിടുന്നതിനാൽ ബി.ജെ.പിയുടെ സംസ്​ഥാന നേതാക്കളെ തെരഞ്ഞെടുപ്പ്​ നേരിടുന്നതിന്​ മുന്നോടിയായി ഡൽഹിയിലേക്ക്​ വിളിപ്പിച്ചിരുന്നു. ഒ​രോ മണ്ഡലത്തിലും പ്രതിജ്ഞാബദ്ധരായ 300-400 പാർട്ടിക്കാരെ തിരിച്ചറിയാനും പാർട്ടിയിൽ ഉൾപ്പെടുത്താൻ കഴിയുന്ന സിഖ്​ നേതാക്കളെ അന്വേഷിക്കാനും പ്രാദേശിക ബി.ജെ.പി നേതാക്കൾക്ക്​ കേന്ദ്ര ആഭ്യന്തരമന്ത്രി അമിത്​ ഷാ നിർദേശം നൽകിയതായാണ്​ വിവരം.

ജൂൺ 16ന്​ ഗുരു കാശി യൂനിവേഴ്​സിറ്റി വൈസ്​ ചാൻസലർ ജസ്​വീന്ദർ സിങ്​ ദില്ലോൻൺ, അഭിഭാഷകരായ ഹരീന്ദർ സിങ്​ കാലോൺ, ജഗ്​മോഹൻ സിങ്​ സായ്​നി തുടങ്ങിയവർ ബി.ജെ.പിയിൽ ചേർന്നിരുന്നു. എന്നാൽ, ഇവർക്കാർക്കും രാഷ്​ട്രീയ മുഖം ഇല്ലാത്തതാണ്​ ബി.ജെ.പി തിരിച്ചടിയായി വിലയിരുത്തുന്നത്​. ഇതോടെ സംസ്​ഥാനത്തെ സിഖ്​ വിഭാഗത്തിലെ പ്രഫസർമാർ, വൈസ്​ ചാൻസലർമാർ, ഡോക്​ടർമാർ, അഭിഭാഷകർ എന്നിവരുൾ​പ്പെടെ പ്രമുഖരെ പാർട്ടി കണ്ടെത്താൻ ശ്രമിക്കുന്നതായാണ്​ വിവരം.