ഇനി കശ്​മീർ സുന്ദരികളെ വിവാഹം കഴിക്കാം -വിക്രം സൈനി

മുസഫർനഗർ: ജമ്മുകശ്​മീരിന്​ പ്രത്യേക പദവി നൽകുന്ന ആർട്ടിക്കിൾ 370 റദ്ദാക്കിയതോടെ കശ്​മീരിലെ സുന്ദരികളായ സ്​ത്രീകളെ ആർക്കും വിവാഹം കഴിക്കാമെന്ന വിവാദ പ്രസ്​താവനയുമായി ബി.ജെ.പി എം.എല്‍.എ വിക്രം സൈനി. ബി.ജെ.പി പ്രവർത്തകർക്ക്​ ഇനി കശ്​മീരിൽ സ്ഥലം വാങ്ങുകയോ അവിവാഹിതരായവർക്ക്​ അവിടുന്ന്​ സുന്ദരികളായ കശ്​മീരി വനിതകളെ വിവാഹം കഴിക്കുകയും ചെയ്യാമെന്നായിരുന്നു സൈനിയുടെ പ്രസ്​താവന.

ബി.ജെ.പി പ്രവർത്തകർ വളരെ ഉത്സാഹത്തിലാണ്​. നിങ്ങളിൽ അവിവാഹിതരായവർക്ക്​ ഇനി കശ്​മീരിൽ നിന്നും വിവാഹം കഴിക്കാം. അതൊന്നും ഇന്ന്​ പ്രശ്​നമല്ല. നേരത്തെ കശ്​മീരിൽ സ്​ത്രീകൾക്കെതിരെ വൻ അതിക്രമങ്ങളാണ്​ നടന്നിരുന്നത്​. കശ്​മീരി യുവതി ഉത്തർപ്രദേശിൽ നിന്നുള്ള ഒരാളെ വിവാഹം കഴിക്കുകയാണെങ്കിൽ അവരുടെ പൗരത്വം റദ്ദാക്കുമായിരുന്നു. ഇന്ത്യക്കും കശ്​മീരിനും വ്യത്യസ്​ത പൗരത്വമായിരുന്നു.

മുസ്​ലിം പ്രവർത്തകർക്കും ഇനി സന്തോഷിക്കാം. അവർക്ക്​ കശ്​മീരിലെ വെളുത്ത സുന്ദരികളെ വിവാഹം ചെയ്യാം. ഹിന്ദുക്കൾക്കും മുസ്​ലിംകൾക്കും ഒരുപോലെ സന്തോഷിക്കാവുന്നതാണ്​. രാജ്യത്തിന്​ മുഴുവനായും സന്തോഷിക്കാനുള്ള നടപടിയാണിത്​ - വിക്രം സൈനി മുസഫർനഗറിലെ പൊതുയോഗത്തിൽ പറഞ്ഞു.

വിക്രം സൈനിയു​ടെ പ്രസ്​താവന വിവാദമായതോടെ തിരുത്തുമായി അദ്ദേഹം രംഗത്തെത്തി. കശ്​മീരിലെ ജനങ്ങൾക്ക്​ പൂർണ സ്വാതന്ത്ര്യം ലഭിച്ചുവെന്നാണ്​ താൻ ഉദ്ദേശിച്ചതെന്നും അവിടുത്തെ സ്​ത്രീകൾക്ക്​ എവിടെ നിന്നും വരനെ സ്വീകരിക്കാമെന്ന കാര്യം സത്യമാണെന്നും സൈനി വിശദീകരിച്ചു.