ബംഗാളിലെ ഗുണ്ടായിസം പണ്ടത്തെ കശ്​മീരിലേതിന്​ സമം; ഇപ്പോൾ കശ്​മീരിൽ ആർക്കും ഭൂമിയും വീടും വാങ്ങാം: യോഗി

ഹൂഗ്ലി: ബംഗാളിൽ ബി.ജെ.പി അധികാരത്തിലേറുകയാണെങ്കിൽ ഉത്തർപ്രദേശിലെ ഗുണ്ടകൾക്കുണ്ടായ അതേ വിധിയായിരിക്കും തൃണമൂൽ കോൺഗ്രസിന്‍റെ ഗുണ്ടകൾക്കുമെന്ന്​ യു.പി മുഖ്യമന്ത്രി യോഗി ആദിത്യനാഥ്​. ബംഗാളിൽ നാം കണ്ടുകൊണ്ടിരിക്കുന്ന തരത്തിലുള്ള ഗുണ്ടായിസം ഒരു കാലത്ത്​ കശ്​മീരിലുമുണ്ടായിരുന്നു. എന്നാൽ, ഇന്ന്​ കശ്​മീരിൽ ഭീകരതയില്ല. വികസനമാണ്​ വർധിച്ചുകൊണ്ടിരിക്കുന്നതെന്നും ജംഗൈപാറയിൽ നടന്ന പൊതുയോഗത്തിൽ സംസാരിക്കവേ യോഗി ആദിത്യനാഥ് പറഞ്ഞു.

''ബംഗാളിൽ ബി.ജെ.പി അധികാരത്തിലേറുന്നതോടെ തൃണമൂലിലെ ഗുണ്ടകൾ യുപിയിലെ ഗുണ്ടകളെപോലെ തന്നെ അനുഭവിക്കും. വോ​ട്ടെടുപ്പ്​ ഫലത്തിന്​ ശേഷം അവർ മുട്ടുകുത്തി നിൽക്കും. ദീദി മോശമായ ഭാഷ ഉപയോഗിക്കുകയാണെങ്കിൽ ബംഗാളിലെ യുവാക്കൾ ഉചിതമായ മറുപടി നൽകും''. -യോഗി കൂട്ടിച്ചേർത്തു.

പ്രധാനമന്ത്രി നരേന്ദ്ര മോദിയും അമിത്​ ഷായും ഭീകരതയുടെ ഉറവിടം ആർട്ടിക്കിൾ 370 കശ്​മീരിൽ നിന്നും എടുത്തുകളഞ്ഞു. ഇപ്പോൾ ബംഗാളിലെ യുവാക്കൾക്ക്​ ജമ്മു കശ്​മീരിൽ സ്ഥലവും വീടും വാങ്ങാം. അവർക്ക്​ കേന്ദ്ര ഭരണപ്രദേശങ്ങളിലുള്ള ആളുകളെ പോലെ തന്നെ അവിടെ അവകാശമുണ്ടായിരിക്കും. ബി.ജെ.പി പറയുന്നതെല്ലാം ചെയ്യുന്നവരാണെന്നും'' യോഗി അംതയിൽ നടന്ന പൊതുയോഗത്തിൽ പറഞ്ഞു.

മമതാ ബാനർജിയും സുവേന്ദു അധികാരിയും തമ്മിലുള്ള ഹൈവോൾ​േട്ടജ്​ പോരാട്ടത്തിന്​ ശേഷം പശ്ചിമ ബംഗാൾ തെരഞ്ഞെടുപ്പിന്‍റെ അടുത്ത ഘട്ടം ഏപ്രിൽ ആറിന്​ നടക്കും.