ഖലിസ്ഥാൻ ആക്രമണത്തിൽ ബ്രിട്ടൻ ബാധ്യത നിറവേറ്റിയില്ല; വിമർശനവുമായി വിദേശകാര്യ മന്ത്രി എസ്​. ജയ്​ശങ്കർ

ബംഗളൂരു: യു.കെയിലെ ഇന്ത്യൻ ഹൈക്കമ്മീഷനിൽ ഖലിസ്ഥാൻ അനുകൂലികൾ ഇന്ത്യൻ ത്രിവർണ്ണ പതാക നശിപ്പിച്ചതിൽ ബ്രിട്ടനെതിരെ വിമർശനവുമായി കേന്ദ്ര വിദേശകാര്യ മന്ത്രി എസ്​. ജയ്​ശങ്കർ. ഖലിസ്ഥാൻ ആക്രമണത്തിൽ ബ്രിട്ടൻ ബാധ്യത നിറവേറ്റിയില്ല എന്ന്​ ജയ്​ശങ്കർ തുറന്നടിച്ചു. നിലവിലെ സുരക്ഷാ മാനദണ്ഡങ്ങൾ ഇന്ത്യ അംഗീകരിക്കില്ലെന്ന് അദ്ദേഹം പറഞ്ഞു. ഹൈക്കമ്മീഷനോ കോൺസുലേറ്റോ സ്ഥിതി ചെയ്യുന്ന ഒരു രാജ്യത്ത് മിഷന്റെ നയതന്ത്രജ്ഞർക്ക് സുരക്ഷ നൽകാനുള്ള ബാധ്യത യു.കെ നിറവേറ്റുന്നില്ലെന്നും അദ്ദേഹം കുറ്റപ്പെടുത്തി.

"ഏതെങ്കിലും രാജ്യം വിദേശത്ത് എവിടെയെങ്കിലും എംബസി ഉദ്യോഗസ്​ഥരെ അയക്കുമ്പോഴെല്ലാം, ഒരു നയതന്ത്രജ്ഞന് തന്റെ ജോലി ചെയ്യാൻ സുരക്ഷ നൽകേണ്ടത് സ്വീകരിക്കുന്ന രാജ്യത്തിന്റെ ബാധ്യതയാണ്. എംബസിയോ ഹൈക്കമ്മീഷനോ കോൺസുലേറ്റോ ബഹുമാനിക്കപ്പെടുന്നുവെന്ന് ഉറപ്പാക്കേണ്ടത് സ്വീകരിക്കുന്ന രാജ്യത്തിന്റെ ബാധ്യതയാണ്. ഈ ബാധ്യതകൾ യു.ടെ പാലിച്ചില്ല’’ -ബംഗളൂരു സൗത്ത് എം.പി തേജസ്വി സൂര്യ സംഘടിപ്പിച്ച പരിപാടിയിൽ പ​ങ്കെടുക്കവെ ജയ്​ശങ്കർ പറഞ്ഞു.

‘‘അക്രമികൾ ഹൈക്കമ്മീഷനു മുന്നിൽ ഹാജരായ ദിവസം, ഹൈക്കമ്മീഷനിലെ സുരക്ഷ പ്രതീക്ഷിച്ച നിലവാരം പുലർത്തുന്നതിൽ പരാജയപ്പെട്ടു. ഓരോ രാജ്യത്തിനും സുരക്ഷ സംബന്ധിച്ച്​ വ്യത്യസ്ത കാഴ്ചപ്പാടുണ്ട്​. എന്നാൽ ഒരു വിദേശകാര്യ മന്ത്രി എന്ന നിലയിൽ എനിക്ക് നിങ്ങളോട് പറയാൻ കഴിയും, ഇത്തരത്തിലുള്ള വ്യത്യസ്ത മാനദണ്ഡങ്ങൾ ഞങ്ങൾ അംഗീകരിക്കാൻ പോകുന്നില്ല’’ -ജയ്​ശങ്കർ പറഞ്ഞു.