ജെ.ഇ.ഇ നീറ്റ്​ പരീക്ഷകൾക്ക്​ ഗതാഗത- താമസ സൗകര്യങ്ങൾ സൗജന്യമെന്ന്​ ഒഡീഷ സർക്കാർ

ഭുവനേശ്വർ: ജെ.ഇ.ഇ, നീറ്റ് പരീക്ഷകൾക്ക് ഹാജരാകുന്ന നിർദ്ധനരായ വിദ്യാർഥികൾക്ക്​ ഗതാഗതവും താമസസൗകര്യം സൗജന്യമായി ഒരുക്കിനൽകാൻ തീരുാമനിച്ചതായി ഒഡീഷ സർക്കാർ. കോവിഡ്​ മാഹമാരിയെ കൂടാതെ സംസ്ഥാനം പ്രളയ കെടുതിയും നേരിടുന്നതിനാൽ പരീക്ഷ മാറ്റിവെക്കണമെന്ന്​ ആവശ്യപ്പെട്ട്​ മുഖ്യമന്ത്രി നവീൻ പട്നായിക് കേന്ദ്ര വിദ്യാഭ്യാസ മന്ത്രി രമേശ് പൊഖ്രിയാലിന്​ കത്ത്​ ൻൽകിയിരുന്നു. എന്നാൽ സുപ്രീംകോടതി ഉത്തരവിനെ തുടർന്ന്​ പരീക്ഷ നടക്കാനിരിക്കെ പ്രളയ ബാധിത പ്രദേശങ്ങളിലെയും നിർധന കുടുംബങ്ങളിലെയും വിദ്യാർഥികൾക്ക്​ ഗതാഗത-താമസസൗകര്യമൊരുക്കാൻ സംസ്ഥാന സർക്കാർ തീരുമാനിക്കുകയായിരുന്നുവെന്ന്​ ചീഫ് സെക്രട്ടറി അസിത് കുമാർ ത്രിപാഠി അറിയിച്ചു.

ഒഡീഷയുടെ പകുതിയോളം പ്രദേശങ്ങളിൽ പ്രളയം നാശം വിതച്ചതിനാൽ പൊതുഗതാഗത സൗകര്യമില്ല. പൊതുഗതാഗതമില്ലാത്തത്​ വിദ്യാർഥികൾക്ക്​ പരീക്ഷ സെൻററുകളിലെത്താൻ ബുദ്ധിമുട്ടുണ്ടാക്കും.

സംസ്ഥാനത്തെ ഏഴ് നഗരങ്ങളിലെ 26 കേന്ദ്രങ്ങളിലായി ​ 37,000 പേരാണ്​ ജെ.ഇ.ഇ മെയിൻ പരീക്ഷ എഴുതുക.പരീക്ഷാ കേന്ദ്രങ്ങളിലേക്ക്​ എത്തിപ്പെടാൻ ബുദ്ധിമുട്ടുള്ള വിദ്യാർഥികൾക്ക്​പോളിടെക്നിക് ഇൻസ്റ്റിറ്റ്യൂട്ടുകൾ, എഞ്ചിനീയറിങ്​ കോളേജുകൾ, ഐ.ടി.ഐകൾ എന്നിവിടങ്ങളിൽ സൗജന്യ താമസ സൗകര്യം ഒരുക്കുമെന്ന് ചീഫ്​ സെക്രട്ടറി ത്രിപാഠി അറിയിച്ചു. അപേക്ഷകരെ സ്വന്തം ഗ്രാമത്തിൽ നിന്ന് പരീക്ഷ സെൻററിലേക്ക്​ കൊണ്ടുപോകാൻ സർക്കാർ ബസുകൾ നൽകും.

ഓരോ ജില്ലയിലെയും കാര്യങ്ങൾ ഏകോപിപ്പിക്കുന്നതിന്​ ഒരു ഐ.ടി.ഐയെ നോഡൽ കേന്ദ്രമായി പ്രഖ്യാപിച്ചിട്ടുണ്ട്​. വിദ്യാർഥികളുടെയും അവരുടെ മാതാപിതാക്കളുടെയും യാത്രക്ക്​ യാതൊരു തടസവുമില്ലാതിരിക്കാൻ ജില്ലാ ഭരണകൂടങ്ങൾക്ക് നിർദ്ദേശം നൽകിയിട്ടുണ്ട്. പരീക്ഷകളുടെ അഡ്മിറ്റ് കാർഡ് കാണിച്ചുകൊണ്ട് അപേക്ഷകർക്കും അവരുടെ മാതാപിതാക്കൾക്കും സെൻററിലേക്ക്​ സൗജന്യമായി പോകാം.

ജെ.ഇ.ഇ സെപ്റ്റംബർ ഒന്നു മുതൽ ആറ്​ വരെയാണ്​ നടക്കുക. നീറ്റ് പരീക്ഷ സെപ്റ്റംബർ 13 നും നടക്കും. പരീക്ഷകൾ മാറ്റിവെക്കണമെന്നാവശ്യ​െപ്പട്ട്​ 11 സംസ്ഥാനങ്ങളിൽ നിന്നുള്ള വിദ്യാർത്ഥികൾ സമർപ്പിച്ച ഹരജി സുപ്രീം കോടതി കഴിഞ്ഞ ആഴ്ച തള്ളിയിരുന്നു.