സ്​മാർട്ട്​ഫോൺ വാങ്ങാനായി ഭാര്യയെ 1.8 ലക്ഷത്തിന്​ വിറ്റ 17കാരൻ അറസ്റ്റിൽ

ഭു​വനേശ്വർ: ഒഡിഷയിൽ സ്​മാർട്ട്​ഫോൺ വാങ്ങുന്നതിനായി ഭാര്യയെ 55കാരന്​ വിറ്റ 17കാരൻ അറസ്​റ്റിൽ. വിവാഹത്തിന്​ ഒരു മാസത്തിന്​ ശേഷം​ ഭാര്യയെ 55കാര​നായ രാജസ്​ഥാൻ സ്വദേശിക്ക്​ വിൽക്കുകയായിരുന്നു.

26കാരിയെ രാജസ്​ഥാനിലെ ബാരനിൽനിന്ന്​ പൊലീസ്​ രക്ഷ​െപ്പടുത്തി. രാജസ്​ഥാനിലെ ഗ്രാമത്തി​ൽനിന്ന്​ ​യുവതിയെ രക്ഷപ്പെടുത്തുന്നതിനെത്തിയ പൊലീസിനെ ഗ്രാമവാസികൾ തടഞ്ഞിരുന്നു. യുവതിയെ പണം നൽകി 55കാരൻ വാങ്ങിയതാണെന്ന്​ പറഞ്ഞ്​ ഗ്രാമവാസികൾ തടയുകയായിരുന്നു.

ജൂലൈയിലായിരുന്നു 17കാരന്‍റെയും യുവതിയുടെയും വിവാഹം. 'ആഗസ്റ്റിൽ ഇരുവരും രാജസ്​ഥാനിൽ ഇഷ്​ടിക ചൂളയിൽ ജോലിക്കായി പോയി. പുതിയ ജോലി ലഭിച്ച്​ ദിവസങ്ങൾക്കകം 17കാരൻ ഭാര്യയെ 55കാരന്​ 1.8 ലക്ഷത്തിന്​ വിൽക്കുകയായിരുന്നു' ബേൽപാഡ പൊലീസ്​ സ്​റ്റേഷനിലെ ഇൻസ്പെക്​ടർ ബുലു മുണ്ട പറഞ്ഞു.

ഭാര്യയെ വിറ്റുകിട്ടിയ പണം കൗമാരക്കാരൻ സ്​മാർട്ട്​ ഫോൺ വാങ്ങിയും ഭക്ഷണം കഴിച്ചും തീർക്കുകയായിരുന്നു. പിന്നീട്​ 17കാര​ൻ സ്വന്തം ഗ്രാമത്തിൽ തിരിച്ചെത്തി. ഭാര്യ എവിടെയെന്ന്​ വീട്ടുകാർ ചോദി​ച്ചപ്പോൾ തന്നെ ഉപേക്ഷിച്ച്​ പോയെന്നായിരുന്നു മറുപടി.

എന്നാൽ, യുവതിയുടെ കുടുംബം യുവാവ്​ പറഞ്ഞത്​ വിശ്വസിക്കാതെ പൊലീസിൽ പരാതി നൽകുകയായിരുന്നു. പൊലീസ്​ കോൾ റെക്കോർഡുകൾ പരിശോധിച്ചതോടെ കൗമാരക്കാരന്‍റെ കള്ളം പൊളിഞ്ഞു.

ഇതോടെ പൊലീസ്​ രാജസ്​ഥാനിലെത്തി യുവതി​യെ കണ്ടുപിടിക്കുകയും രക്ഷപ്പെടുത്തുകയുമായിരുന്നു. 17കാരനെ ജുവൈനൽ കോടതിയിൽ ഹാജരാക്കിയ ശേഷം കറക്ഷനൽ ഹോമിലേക്ക്​ മാറ്റി.