ലഖിംപൂർ കർഷകഹത്യ; സുപ്രീംകോടതി പരിഗണിക്കുന്നതിന് തൊട്ടുമുമ്പ് അന്വേഷണ കമീഷനെ നിയോഗിച്ച് യു.പി സർക്കാർ

ലഖ്നോ: ലഖിംപൂർ ഖേരിയിൽ പ്രതിഷേധത്തിനിടെ കർഷകരെ വാഹനമിടിച്ച് കൊലപ്പെടുത്തിയ സംഭവത്തിൽ സ്വമേധയാ എടുത്ത കേസ് സുപ്രീംകോടതി പരിഗണിക്കുന്നതിന് തൊട്ടുമുമ്പായി അന്വേഷണ കമീഷനെ നിയോഗിച്ച് യു.പി സർക്കാർ. അലഹബാദ് ഹൈക്കോടതിയില്‍ നിന്ന് വിരമിച്ച ജഡ്ജി പ്രദീപ് കുമാര്‍ ശ്രിവാസ്തവയാകും ലഖിംപൂര്‍ ഖേരി സംഭവം അന്വേഷിക്കുക. വിഷയത്തില്‍ സ്വമേധയാ എടുത്ത കേസ് ചീഫ് ജസ്റ്റിസ് എന്‍.വി. രമണയുടെ നേതൃത്വത്തിലുള്ള മൂന്നംഗ ബെഞ്ച് ഇന്ന് പരിഗണിക്കും. അതിനിടെ, മരിച്ച എട്ട് പേരുടെയും കുടുംബത്തിന് നഷ്ടപരിഹാരമായി 45 ലക്ഷം വീതം എത്തിച്ചുനൽകുകയും ചെയ്തു.

സുപ്രീംകോടതി മേൽനോട്ടത്തിൽ ഉന്നതതല അന്വേഷണം വേണമെന്നാവശ്യപ്പെട്ട് യു.പിയിലെ രണ്ട് അഭിഭാഷകർ ഹരജി നൽകിയിരുന്നു. കേസിൽ യു.പി സർക്കാറിന്‍റെ വിശദീകരണം കോടതി തേടാനുള്ള സാധ്യതയുണ്ടായിരുന്നു. ഇതിന് മുന്നോടിയായാണ് സർക്കാർ അന്വേഷണം പ്രഖ്യാപിച്ചത്.

ഞായറാഴ്ച വൈകീട്ടാണ് ലഖിംപൂര്‍ ഖേരിയില്‍ പ്രതിഷേധ സമരം നടത്തിയ കര്‍ഷകര്‍ക്കിടയിലേക്ക് കേന്ദ്രമന്ത്രി അജയ് മിശ്രയുടെ മകന്‍ വാഹനം ഓടിച്ചുകയറ്റിയത്. നാല് കര്‍ഷകര്‍ ഉള്‍പ്പെടെ എട്ടുപേരാണ് ഇതില്‍ കൊല്ലപ്പെട്ടത്.

വാഹനമോടിച്ചത് അജയ് മിശ്രയുടെ മകന്‍ ആശിഷ് മിശ്രയാണെന്നാണ് കര്‍ഷകര്‍ ചൂണ്ടിക്കാട്ടുന്നു. അദ്ദേഹത്തിനെതിരെ കേസെടുത്തെങ്കിലും ഇതുവരെ അറസ്റ്റ് ചെയ്യാന്‍ പൊലീസ് തയ്യാറായിട്ടില്ല. അതിനിടെ കോണ്‍ഗ്രസ് നേതാക്കളായ രാഹുല്‍ ഗാന്ധിയും പ്രിയങ്കാ ഗാന്ധിയും ലഖിംപൂരിലെത്തി കര്‍ഷകരുടെ വീടുകള്‍ സന്ദര്‍ശിച്ചു. പഞ്ചാബ് മുഖ്യമന്ത്രി ചരണ്‍ജിത്ത് സിങ് ചന്നി, ഛത്തീസ്ഗഡ് മുഖ്യമന്ത്രി ഭൂപേഷ് ബാഗേല്‍, എ.ഐ.സി.സി ജനറല്‍ സെക്രട്ടറി കെ.സി. വേണുഗോപാല്‍ തുടങ്ങിയവരും ഇവര്‍ക്കൊപ്പമുണ്ട്.