99 സീറ്റുകൾ നൽകാമെന്ന്​ അഖിലേഷ്​; ഒാഫർ നിരസിച്ച്​ കോ​ൺ​ഗ്രസ്​

അലഹാബാദ്​: ഉത്തർപ്രദേശ്​ തെരഞ്ഞെടുപ്പിൽ കോൺഗ്രസിന്​ 99 സീറ്റുകൾ നൽകാമെന്ന്​ ഉത്തർപ്രദേശ്​ മുഖ്യമന്ത്രിയും സമാജ്​വാദി പാർട്ടി നേതാവുമായ അഖിലേഷ്​ യാദവ്​ . എന്നാൽ  എസ്​.പിയുടെ ഒാഫറിനോട്​ കോൺഗ്രസ്​ നേതൃത്വം അനുകൂലമായി പ്രതികരിച്ചിട്ടില്ലെന്നാണ്​ സൂചന. 110 സീറ്റുകൾ തന്നെ വേണമെന്ന നിലപാടിലാണ്​ കോൺഗ്രസ്​. സീറ്റ്​ സംബന്ധിച്ച് ധാരണയാകുന്നതിനായി ​ഇന്ന്​ നടത്തിയ ചർച്ച വിജയിച്ചില്ല. 

വെള്ളിയാഴ്​ച 210 സ്ഥാനാർത്ഥികളുടെ പട്ടിക സമാജ്​വാദി പാർട്ടി പുറത്തിറക്കിയിരുന്നു. ഇതിൽ കോൺഗ്രസി​​െൻറ പല സിറ്റിംഗ്​ സീറ്റുകളും ഉൾപ്പെടുകയും ചെയ്​തിരുന്നു. ഇതാണ്​ കോൺഗ്രസ്​–എസ്​പി സഖ്യത്തിൽ വിള്ളൽ വീഴ്​ത്തിയത്​. കോൺഗ്രസിന്​ സ്വാധീനമുള്ള റായ്​ബറേലി, അമേഠി എന്നിവിടങ്ങളും സമാജ്​വാദി പാർട്ടി സ്ഥാനാർത്ഥിക​ളെ  പ്രഖ്യാപിച്ചിരുന്നു.

എന്നാൽ ഇനിയൊരു ചർച്ചക്ക്​ അഖിലേഷ്​ വഴങ്ങില്ലെന്നാണ്​ സൂചന. നാളെ തന്നെ പാർട്ടിയുടെ പ്രകടന പത്രിക പുറത്തിറക്കാനൊരുങ്ങുകയാണ്​ അഖിലേഷ്​ യാദവ്​. ഉത്തർപ്രദേശിൽ മുസ്​ലിം സമുദായത്തിൽ കോൺഗ്രസിന്​ നിർണായക സ്വാധീനമുണ്ടായിരുന്നു. എന്നാൽ സമാജ്​വാദി പാർട്ടിയുടെ വരവോട്​ ആ സ്വാധീനത്തിൽ ഇടിവ്​ സംഭവിച്ചു. സഖ്യത്തിലൂടെ നഷ്​ടപ്രതാപം തിരിച്ച്​ പിടിക്കാനാണ്​ കോൺഗ്രസ്​ ലക്ഷ്യമിടുന്നത്​. കോൺഗ്രസുമായുള്ള സഖ്യത്തിലൂടെ ബി.ജെ.പി ഉയർത്തുന്ന വെല്ലുവിളി മറകടക്കാൻ കഴിയുമെന്ന്​ സമാജ്​വാദി പാർട്ടിയും പ്രതീക്ഷിക്കുന്നു.