കോവിഡിൽ ശ്വാസം പിടയുന്ന നാടിന്​ 'ഓക്​സിജൻ അടുക്കള'യൊരുക്കി ഗുരുദ്വാര

ഗാസിയാബാദ്​: ഡൽഹിയും പരിസരങ്ങളും കോവിഡ്​ പിടിച്ച്​ ഓക്​സിജൻ കിട്ടാക്കനിയായി ശ്വാസംമുട്ടു​​േമ്പാൾ മനുഷ്യർക്ക്​ ആശ്വാസം പകർന്ന്​ ഒാക്​സിജൻ അടുക്കളയുമായി പരിസരത്തെ ഗുരുദ്വാര സമിതി. ഗാസിയാബാദിനടുത്തെ ഇന്ദീരപുരം ഗുരുദ്വാരയോടു ചേർന്നാണ്​ ഓക്​സിജൻ ആവശ്യക്കാർക്ക്​ സിലിണ്ടർ വിതരണത്തിന്​ 'ഓക്​സിജൻ ലാംഗർ' തുറന്നത്​.

വീടുകളിൽ കൊണ്ടുപോകാൻ മാത്രം ശേഖരമില്ലാത്തതിനാൽ രോഗികൾക്ക്​ ഇവിടെയെത്തി ശരീര സ്​ഥിതി സാധാരണനിലയിലെത്തുംവരെ ഓക്​സിജൻ എടുക്കാം. ഇതുവരെയായി 250 കോവിഡ്​ രോഗികൾക്ക്​ ആശ്വാസം പകരാനായെന്ന്​ സംഘാടകർ പറയുന്നു.

വെള്ളിയാഴ്ച വിവരമറിഞ്ഞ്​ നിരവധി കുടുംബങ്ങളാണ്​ വാഹനങ്ങളിലും അല്ലാതെയും ഗുരുദ്വാരക്കു സമീപം എത്തി സേവനം പ്രയോജനപ്പെടുത്തിയത്​. വാഹനങ്ങളിൽ ഇരുന്ന രോഗികൾക്ക്​ സമീപത്തെ സിലിണ്ടറുകളിൽനിന്ന്​ ഓക്​സിജൻ സ്വീകരിക്കാൻ സൗകര്യവുമൊരുക്കി നൽകി.

25 വലിയ സിലിണ്ടറുകളാണ്​ ഗുരുദ്വാരയിൽ എത്തിച്ചത്​. എന്നാൽ, ശരാശരി 500 ലേറെ രോഗികൾ ആവശ്യക്കാരുള്ളതിനാൽ ഇത്​ മതിയാകില്ലെന്നതാണ്​ ​പ്രശ്​നം.

ആവശ്യക്കാർക്ക്​ ഏതുനിമിഷവും ബന്ധപ്പെടാൻ സംഘാടകർ ഫോൺ നമ്പറും പരസ്യപ്പെടുത്തിയിട്ടുണ്ട്​. തിരക്കുള്ളപ്പോൾ വന്ന്​ വരിയിൽ നിൽക്കുന്നത്​ ഒഴിവാക്കാനും ഇത്​ സഹായകമാകുമെന്ന്​ അവർ കരുതുന്നു. കൂടുതൽ പേർ എത്തുന്നതിനാൽ കൂടുതൽ സിലിണ്ടറുകൾ അനുവദിച്ചുതരണമെന്നാണ്​ ഗുരുദ്വാര മാനേജറുടെ അപേക്ഷ.